აჭარის სოფლის მეურნეობის მინისტრის მოადგილედ ჯამბულ ხოზრევანიძე დაინიშნა

აჭარის სოფლის მეურნეობის მინისტრის, ავთანდილ მესხიძის მოადგილედ ჯამბულ ხოზრევანიძე დაინიშნა. იგი  2014-2017 წლებში ხულოს მუნიციპალიტეტში საკრებულოს თავმჯდომარედ მუშაობდა.

სამინისტროს ცნობით, ჯამბულ ხოზრევანიძე პროფესიით ინჟინერია. სხვადასხვა პერიოდში მუშაობდა არასაბანკო სადეპოზიტო დაწესებულება გლეხთა საკრედიტო კავშირის სამეთვალყურო საბჭოს თავმჯდომარედ, 2004-2005 წლებში იყო საქართველოს ლტოლვილთა და განსახლების მინისტრის მოადგილე.

2016 წელს, ხულოს საკრებულოს თავმჯდომარეობის დროს ჯამბულ ხოზრევანიძემ „ქართული ოცნებიდან“ ხულოს, შუახევის და ქედის მაჟორიტარობის კანდიდატად პარლამენტში ანზორ ბოლქვაძის ოფიციალურად წარდგენა გააპროტესტა. ჯამბულ ხორევანიძემ მაშინ ფეისბუქზე გამოაქვეყნა სტატუსი, რომ „ოცნებაში პორტირებული ნაციონალების ზეიმია“ და ანზორ ბოლქვაძემ კონკრეტულ კითხვებს უნდა გასცეს პასუხი. იმავე დღეს მან ფეისბუქზე სტატუსი წაშალა, „ბათუმელებთან“ მან არ დააკონკრეტა, ვისგან მიიღო მითითება სოციალურ ქსელში გამოქვეყნებული სტატუსის წაშლის შესახებ.

„ბათუმელები“ მაშინ ანზორ ბოლქვაძესაც ესაუბარა, რომელმაც განაცხადა, რომ ხულოს საკრებულოს თავმჯდომარის უკმაყოფილების მიზეზი ის იყო, რომ მას თავად სურდა აჭარის მაღალმთიანეთის მაჟორიტარი გამხდარიყო.

____________

მთავარ ფოტოზე: ჯამბულ ხოზრევანიძე და ავთანდილ მესხიძე. ფოტო: აჭარის სოფლის მეურნეობის სამინისტრო 

ნეტგაზეთის მასალების სხვა გამოცემებში გადაბეჭდვის წესი


ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com