საქართველოს სახალხო დამცველის მიერ მასალების შესწავლამ ცხადყო, რომ ტრანსგენდერები პრობლემებს აწყდებიან სამოქალაქო აქტების ჩანაწერში სქესის შეცვლისას, რაც თავის მხრივ, ხელშემშლელი ფაქტორია განათლების მიღებისა და დასაქმების პროცესში.
„სამოქალაქო აქტების შესახებ“ საქართველოს კანონის 78-ე მუხლი განსაზღვრავს გარემოებათა ჩამონათვალს, რაც შესაძლოა გახდეს სამოქალაქო აქტის ჩანაწერში ცვლილების შეტანის საფუძველი. ერთ-ერთ ასეთ გარემოებად მითითებულია „სქესის შეცვლა – თუ სქესის შეცვლასთან დაკავშირებით პირს სურს სახელის ან გვარის შეცვლა“. თუმცა, არ არსებობს დოკუმენტების ჩამონათვალი, რომელიც პირმა უნდა წარადგინოს სამოქალაქო აქტში შესაბამისი ცვლილების განხორციელებისთვის, ასევე არ არის განსაზღვრული ამ მუხლის მიზნებისათვის რა მიიჩნევა „სქესის შეცვლად“.
”კანონით დადგენილი წესის ბუნდოვანების გამო მნიშვნელოვანია საკითხი დარეგულირდეს სპეციალური წესით, რომელიც უნდა შემუშავდეს და დამტკიცდეს საერთაშორისო ხელშეკრულებებით ნაკისრი ვალდებულებებისა და გენდერული თანასწორობის მიღწევის სფეროში წარმატებული ქვეყნების პრაქტიკის გათვალისწინებით. სამოქალაქო აქტებში სქესის ჩანაწერის შეცვლის შესაძლებლობა საშუალებას მისცემს ტრანსგენდერებს განახორციელონ თავიანთი ფუნდამენტური უფლებები და მოახდინონ საზოგადოებაში სრული ინტეგრაცია”, – წერია იუსტიციის სამინისტროში გაგზავნილ წინადადებაში.
”ბათუმელებს” იუსტიციის სამინისტროში განუმარტეს, რომ მინისტრი თეა წულუკიანი მოადგილეებთან ერთად უკრაინაში იმყოფება. შესაბამისად, ამ რეკომენდაციასთან დაკავშირებით მისი პოზიცია, ჯერჯერობით, უცნობია.
