Batumelebi | საუკუნის სახლი ბათუმში, რომლის დანგრევასაც აპირებენ [ფოტო] საუკუნის სახლი ბათუმში, რომლის დანგრევასაც აპირებენ [ფოტო] – Batumelebi
RU | GE  

საუკუნის სახლი ბათუმში, რომლის დანგრევასაც აპირებენ [ფოტო]

 

ბათუმში მე-19 საუკუნეში აშენებული სახლის დანგრევას აპირებენ. ბათუმის მერიის არქიტექტურისა და ლანდშაფტური დაგეგმარების სამსახურს ჯერ მშენებლობის ნებართვა არ გაუცია, თუმცა ვაჟა-ფშაველას #13 მდებარე სახლი მობინადრეებისგან უკვე დაცლილია.  შპს „სლავა 2015“ გადაწყვეტილი აქვს ამ ადგილას რვასართულიანი კორპუსი ააშენოს. კომპანიის ხელმძღვანელი მურმან ჯინჭარაძე „ბათუმელებთან“ საუბარში ამბობს რომ სახლი ავარიული იყო და რესტავრაციას არ ექვემდებარებოდა. მისივე თქმით ამის დამადასტურებელ დოკუმენტაციას ხვალ, 22 აპრილს წარმოადგენს.  

ვაჟა-ფშაველას #13 მდებარე სახლი კულტურული მემკვიდრეობის ძეგლი არ არის. საზოგადოება „ბათომის“ წევრი შოთა გუჯაბიძე ამბობს მიუხედავად ამისა მას კანონი „კულტურული მემკვიდრეობის შესახებ“ იცავს.

„შენობა არ არის აუცილებელი რომ იყოს კულტურული მემკვიდრეობის ზეგლის სტატუსის მქონე. კანონი კულტურული მემკვიდრეობის შესახებ იცავს რამდენიმე კატეგორიის შენობას, როგორიც არის მაგალითად: ისტორიული შენობა, კულტურული მემკვიდრეობა, ასი წლის ხანდაზმული შენობა და ძეგლის ნიშნის მქონე. ეს სახლი მინიმუმ ოთხ კატეგორიას აკმაყოფილებს. მისი დანგრევა არის დანაშაული. თან შეგნებული დანგრევა.  არ არსებობს არანაირი დასკვნა რომ შენობის შენარჩუნება შეუძლებელია.

რამდენიმე თვის წინ  „ბათომი“ და „თბილისის ჰამქარი“ ერთობლივ პროექტში ვმონაწილეობდით. პროექტი ითვალისწინებდა იმ ნაგებობების გაცნობას ფართო საზოგადოებისათვის, რომელსაც არა აქვს  კულტურული მეკვიდრეობის ძეგლის სტატუსი, მაგრამ იმსახურებენ.  რამდენიმე შენობაზე ვიმუშავეთ. მათ შორის იყო ეს შენობა. არსებობს ხელოვნებათმცოდნე მაია ჭიჭილეიშვილის ძალიან კვალიფიციური დასკვნა, რომ ეს სახლი აუცილებლად იმსახურებს კულტურული მემკვიდრეობის ძეგლის სტატუსს“, – ამბობს შოთა გუჯაბიძე.

„ბათუმელები“  გთავაზობთ ფოტოებს, თუ როგორ გამოიყურება ვაჟა-ფშაველას #13 მდებარე სახლის ინტერიერი.

 

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი