Batumelebi | რა გამოიფინება ბათუმის მუზეუმში რა გამოიფინება ბათუმის მუზეუმში – Batumelebi
RU | GE  

რა გამოიფინება ბათუმის მუზეუმში

 

ბათუმში, ხულოს ქუჩაზე მდებარე ძველი აბანოების შენობაში „ბათუმის მუზეუმი“ გაიხსნება, სადაც ანტიკური ეპოქიდან დღემდე ბათუმის ისტორიის ამსახველი ექსპონატები განთავსდება. ახალი მუზეუმი კულტურული მემკვიდრეობის დაცვის სააგენტოს დაქვემდებარებაში იქნება.  

 

ბათუმის მუზეუმის პროექტი
ბათუმის მუზეუმის პროექტი

რეკონსტრუქციის არქიტექტურული პროექტი, აბანოების შენობის ნაწილობრივ დემონტაჟს ითვალისწინებს: „გუმბათებისა და მზარდი კედლების შენარჩუნებით მათში არსებული ლოკალური დაზიანებების პირველადი აღდგენით.“

 

პროექტი ჯერ კიდევ განხილვის სტადიაშია. კონკრეტულად რა ექსპონატები შეინახება მუზეუმში, ჯერ უცნობია, თუმცა აჭარის კულტურული მემკვიდრეობის დაცვის სააგენტოს ხელმძღვანელის მოადგილის, ბიძინა აფხაზავას თქმით, პროექტს ბევრი შემწირველი ჰყავს: „მუზეუმი, ძირითადად, შემოწირულობების ბაზაზე იქნება. მუზეუმის ექსპონატების დაახლოებით 20-პროცენტი შემოწირულობა იქნება, სხვა ყველა დანარჩენი იქნება ჩვენი მოპოვებული“, – ამბობს ის. ბიძინა აფხაზავა აპირებს ბათუმის მუზეუმს თავისი კოლექციიდან შეწიროს ნივთები, „არიან სხვა შემომწირველებიც, მაგალითად, შოთა გუჯაბიძე მოგვცემს კოპიოებს, მიშა ალშიბაია – მოსკოველი კოლექციონერი გვაძლევს ძალიან კარგ ნივთებს, კაკო ძნელაძე და სხვები.“

 

 

უცნობია თუ ვინ იქნება ბათუმის მუზეუმის ხელმძღვანელი, თუმცა ბიძინა აფხაზავას თქმით, მუზეუმის დანარჩენ თანამშრომლებს სწორედ ის შეარჩევს. „მუზეუმი სხვა სპეციფიკაა, სხვა სირთულეებია, მუზეუმში ასე ადვილი არ არის მუშაობა, ამიტომ ვინც იქნება დირექტორი, სავარაუდოდ, ის შეარჩევს თანამშრომლებსაც“, – ამბობს ბიძინა აფხაზავა. მისი თქმით, იმ შემთხვევაში, თუკი მას შესთავაზებენ მუზეუმის დირექტორობას, იგი სიამოვნებით დათანხმდება: „იმიტომ, რომ ბათუმის მუზეუმი ჩემი იდეაა და დიდი სიამოვნებით გავყვები ამ იდეას თავიდან ბოლომდე.“

 

როგორც კულტურული მემკვიდრეობის დაცვის სააგენტოში ამბობენ, „ბათუმის მუზეუმის“ გახსნას თავდაპირველად იმ შენობაში განიხილავდნენ, რომელშიც დღეს ცვილის ფიგურების მუზეუმია განთავსებული. ბიძინა აფხაზავას თქმით, ამ ეტაპზე ცვილის ფიგურების მუზეუმს მიჩენილი ჰყავს თანამშრომელი, რომელიც ყოველდღიურად უვლის ექსპონატებს და იცავს იმ ტემპერატურას, რომელიც ამ ფიგურების შესანახად არის აუცილებელი – „იმ პატარა ქურდობის შედეგად, რაც იქ მოხდა, მხოლოდ ერთი ფიგურაა დაზიანებული, სხვა ყველაფერი თავის ადგილზეა“, – ამბობს ბიძინა აფხაზავა.

 

 

ამ ეტაპზე ცვილის ფიგურების მუზეუმში არანაირი სიახლე არ იგეგმება, ამის მიზეზი კი ის არის, რომ შენობა, რომელშიც ცვილის ფიგურების მუზეუმია განთავსებული, ჯერჯერობით არ არის სააგენტოს საკუთრებაში: „როცა შენობა გადმოეცემა სააგენტოს, მერე გადაწყდება ყველაფერი. ამ ეტაპისთვის არანაირ სიახლეს არ ვგეგმავთ, თუმცა მომავალ წელს შეიძლება დაიგეგმოს“, – ამბობს ის.

ამჟამად ცვილის მუზეუმის შენობა არქიტექტორთა კავშირის საკუთრებაშია.

 

 

აჭარის კულტურული მემკვიდრეობის დაცვის სააგენტომ ბათუმის მუზეუმისათვის განკუთვნილი შენობის – ძველი აბანოს რეაბილიტაციისთვის სამშენებლო კომპანიის შესარჩევად ტენდერი უკვე გამოაცხადა. სამუშაოებისთვის 550 000 ლარია გათვალისწინებული.  

 

ნეტგაზეთის მასალების სხვა გამოცემებში გადაბეჭდვის წესი
ია ფრანგიშვილი