ანა სანიკიძე ბათუმის უნივერსიტეტის ტურიზმის ფაკულტეტის მეორე კურსის სტუდენტია. ის ტელემარკის უნივერსიტეტში საერთაშორისო ტურიზმისა და მდგრადი განვითარების ფაკულტეტზე გააგრძელებს სწავლას. „ვფიქრობ, ჩვენი უნივერსიტეტისთვის ყველაზე მასშტაბური და კარგი პროგრამაა.
მოლოდინები დიდი მაქვს, ერთი წლის განმავლობაში ვისწავლი ევროპის უნივერსიტეტში, რომლის განათლების ხარისხი ძალიან მაღალია, სტიპენდია და სწავლის პირობები კი მომცემს საშუალებას ევროპის 16 ქვეყანაში ვიმოგზაურო. ძალიან დიდი პერსპექტივა მომეცემა ამ პროგრამაში მონაწილეობით.
პროგრამაში ჩართვამდე ვცადე მევლანას პროგრამაში მონაწილეობა, სადაც ორი ქულა დამაკლდა, მერე გერმანიის პროგრამაში გავიმარჯვე, სადაც მშობლებმა არ გამიშვეს. ამ პროგრამაზე მშობლებმა უარი ვეღარ მითხრეს, რადგან დავანახე ის შესაძლებლობა, რასაც მაძლევს ეს პროექტი,” – ამბობს ანა.
საზღვარგარეთ სწავლის გაგრძელება ვახტანგ გვენეტაძის დიდი ხნის სურვილია. ის ფიქრობს, რომ ტურიზმის ფაკულტეტის სტუდენტი განვითარებას ყველაზე კარგად ამ გზით შეძლებს: „პირველ რიგში პროგრამა დამეხმარება ცოდნის მიღებაში, მეორე მომცემს საშუალებას ინგლისური ენა გავიუმჯობესო და მესამე – დასაქმების შანსებს გამიზრდის. გამარჯვების მოპოვებაში დამეხმარა ჩემი სამუშაო გამოცდილებაც. რუსულენოვანი გიდი ვარ, სხვადასხვა კომპანიასთან ვმუშაობ. ნორვეგიიდან დაბრუნების შემდეგ ვგეგმავ პროფესიულ განვითარებას. ბაკალავრიატის დასრულების შემდეგ მინდა მაგსტრატურა მთლიანად საზღვარგარეთ გავიარო, ამჯერადაც გული ევროპისკენ მიმიწევს.”
პროექტი სამი წელია ხორციელდება ბათუმის შოთა რუსთაველის უნივერსიტეტში. ირმა დოლიძე პირველივე წლიდან ცდილობს გამარჯვებას, თუმცა აქამდე არ უმართლებდა: „ბედნიერი ვარ, ჩემი მცდელობა წარმატებით დასრულდა. ჩვენ ხომ ნორვეგიაზე ვსაუბრობთ, ქვეყანაზე, სადაც ადამიანის განვითარების ინდექსი ყველაზე მაღალია მსოფლიოში. უპირველეს ყოვლისა ეს პრესტიჟია. მეორეც, ინგლისური ენის დახვეწის საშუალება მეძლევა და მესამე, ლექციებს წაგვიკითხავენ კომპეტენტური ლექტორები. ისინი გაგვიზიარებენ თავიანთ გამოცდილებასა და მიღწევებს. ვიმედოვნებ, როცა დავბრუნდები საქართველოში, იქაური განათლება და ენის ცოდნა კარგი სამსახურის პოვნაში დამეხმარება.”
ირმა სასწავლებლად ნორვეგიაში ერთი სემესტრი დარჩება. ის სწავლას საერთაშორისო ტურიზმისა და ინოვაციების ფაკულტეტზე გააგრძელებს, მისი სტიპენდია 1200 ევრო ექნება.
ანა ჯაფარიძესაც მეორე ცდაზე გაუმართლა: „შარშან ათეულში გავედი, თუმცა სამ გამარჯვებულს შორის ვერ მოვხვდი, პირველ კურსზე ვიყავი, გამოცდილება მაკლდა. წელს ექვსი სტუდენტს შეეძლო წასვლა, ამან სტიმული გამიზარდა, აკადემიური მოსწრება წელს უფრო მაღალი მქონდა, ენაც გავიუმჯობესე, შესაბამისად, ექვს სტუდენტს შორის მოვხვდი. როდესაც უნივერსიტეტი გაძლევს ასეთ შანსს, ის უნდა გამოიყენო. სხვა პროგრამებში არ მიცდია ბედი, ნორვეგიაზე ვიყავი ორიენტირებული, ევროპაში ერთ-ერთი მოწინავე ქვეყანა განათლების მხრივ. ტურიზმს რადგან ვსწავლობ, უფრო პრიორიტეტულიც არის”.
