ჩემპიონატისთვის მოსამზადებლად აჭარის კრივის ახალგაზრდული ნაკრები ბაკურიანში 10 დღიან შეკრებაზე იმყოფება.
როგორც ნაკრების მთავარი მწვრთნელი გოჩა აბაშიძე ამბობს, საქართველოს ჩემპიონატი 26 იანვარს უნდა ჩატარებულიყო, მაგრამ ჩემპიონატში მონაწილე რეგიონებმა, უარი თქვეს მონაწილეობაზე, რადგან ადგილობრივი თვითმმართველობები, საიდანაც ფედერაციები ფინანსდება ჩემპიონატში მონაწილებისთვის თანხებს ტურნირის ჩატარების შემდეგ გადასცემდა.
საქართველოს კრივის ეროვნული ფედერაციის პრეზიდენტის დავით კვაჭაძის ინფორმაციით, ჩემპიონატი თებერვლის ბოლოს ახალციხეში ჩატარდება.
საქართველოს ჩემპიონატის შემდეგ ჩამოყალიბდება კრივის ახალგაზრდული ეროვნული ნაკრები, რომელიც 2015 წლის შემოდგომაზე ევროპისა და მსოფლიოს პირველობებზე იასპარეზებს.
რაც შეეხება აჭარის ახალგაზრდულ ნაკრებს, ის ბათუმში ორშაბათს დაბრუნდება და საქართველოს ჩემპიონატისთვის მზადებას ერთ დღიანი შესვენების შემდეგ, ბათუმის სასპორტო სკოლაში კვლავ გააგრძელებს.
„ჩვენ კარგ კონდიციებში ვართ, ვფიქრობ, რომ საქართველოს ჩემპიონატზე ხუთ მედალს მაინც მოვიპოვებთ“ – აცხადებს ნაკრების მთავარი მწვრთნელი გოჩა აბაშიძე.
აჭარის კრივის ახალგაზრდული ნაკრების შემადგენლობაში არიან:
- ლაშა ნარაკიძე – გუნდის კაპიტანი
- ბექა ბოლქვაძე
- თომა მამულაძე
- გოჩა დემურაძე
- გიორგი ხაჩიძე
- დავით შილპაქსიანი
- მირზა მიქელაძე
- ჯაბა ხალვაში
- გიორგი შუშაძე
- გრიგოლ უსნიანი
