თურქული მედიის ცნობით, დღეს, 15 აპრილს, სამხრეთ პროვინცია ქაჰრამანმარაშში მერვე კლასის მოსწავლემ სკოლაში ცეცხლი გახსნა, რის შედეგადაც ცხრა ადამიანი დაიღუპა და 13 დაშავდა.
დაღუპულთაგან 8 მოსწავლე და ერთი მასწავლებელია.
თურქული მედიის „ჰურიეთის“ ინფორმაციით, კაჰრამანმარაშის გუბერნატორის თქმით, თავდასხმაში ეჭვმიტანილი, 14 წლის მოსწავლე, სკოლაში ცეცხლსასროლი იარაღით მივიდა. ხელისუფლება ვარაუდობს, რომ იარაღი თავდამსხმელის მამას, ყოფილ პოლიციელს, ეკუთვნოდა.
14 წლის მოსწავლემ ჯერ სკოლის ეზოში ისროლა, შემდეგ კი – შენობაში.
სროლის შემდეგ მან თავი მოიკლა.
მედიის ცნობით, ადგილზე ჩავიდნენ თურქეთის შს, განათლებისა და ჯანდაცვის მინისტრები.
ეს არის სკოლაში სროლის მეორე შემთხვევა თურქეთში ბოლო ორი დღის განმავლობაში.
სკოლაზე თავდასხმის პირველი შემთხვევა გუშინ, 14 აპრილს, ქაჰრამანმარაშის პროვინციის მეზობელ რეგიონში, შანლიურფას პროვინციაში მოხდა, სადაც 19 წლის ბიჭის თავდასხმის შედეგად სკოლაში 16 ადამიანი დაშავდა.
“სი-ენ-ენ თურქის” ინფორმაციით, დააკავეს და დაკითხვაზე გადაიყვანეს თავდასხმაში ეჭვმიტანილი სკოლის მოსწავლის მშობლები.
ფოტო: „ანადოლუ“
ამავე თემაზე:
თურქეთში 19 წლის ბიჭმა სკოლაში ცეცხლი გახსნა – დაშავდა 16 ადამიანი
