თურქული მედიის ცნობით, დღეს, 14 აპრილს, თურქეთში, შანლიურფას პროვინციაში მდებარე სკოლაში შეიარაღებული პირი შეიჭრა და ცეცხლი გახსნა.
თურქეთის შინაგან საქმეთა სამინისტროს განცხადებით, თავდასხმის შედეგად დაშავდა სულ მცირე 16 ადამიანი — 10 მოსწავლე, 4 მასწავლებელი, ერთი პოლიციელი და ბუფეტის ერთი თანამშრომელი.
დაშავებულები საავადმყოფოში გადაიყვანეს. მათი ჯანმრთელობის მდგომარეობა, გავრცელებული ინფორმაციით, სტაბილურია.
თავდამსხმელმა სიცოცხლე თვითმკვლელობით, იმავე იარაღით დაასრულა. არსებული ინფორმაციით, თავდამსხმელი 19 წლის, ამავე სკოლის ყოფილი მოსწავლე იყო, რომელიც მხოლოდ მე-9 კლასში სწავლობდა აღნიშნულ სკოლაში.
თვითმხილველების თქმით, ის მოულოდნელად შევიდა კლასში და რამდენჯერმე გაისროლა, რის შედეგადაც რამდენიმე ადამიანი დაიჭრა.
შანლიურფას გუბერნატორმა განაცხადა, რომ შემთხვევის მოტივი ამ ეტაპზე უცნობია.
ინციდენტის შემდეგ სკოლიდან მოსწავლეების ევაკუაცია განხორციელდა.
___________________
ფოტო: „ჰურიეთი“/hurriyetdailynews.com
