რუსეთის ოფიციალური წრეები ადასტურებენ რუსი გენერალ-ლეიტენანტის, ჩრდილოეთის ფლოტის ავიაციის მეთაურის, ალექსანდრე ოტროშენკოს დაღუპვას. ამის შესახებ რუსული მედია მურმანსკის ოლქის გუბერნატორ ანდრეი ჩიბისზე დაყრდნობით წერს. ჩიბისმა ეს განცხადება მთავრობის სხდომაზე გააკეთა, რომელიც წუთიერი დუმილით დაიწყო – წერს რუსული მედია.
ოტროშენკო ანექსირებულ ყირიმში სამხედრო-სატრანსპორტო თვითმფრინავ Ан 26-ის ჩამოვარდნის შედეგად დაიღუპა.
Ан 26-ის ბორტზე, რომელიც 31 მარტს ჩამოვარდა, 29 ადამიანი იმყოფებოდა – მათ შორის ეკიპაჟის ექვსი წევრი – ოფიცრები და 23 მგზავრი. ყველა დაიღუპა. რუსეთის თავდაცვის სამინისტრო აცხადებს, რომ თვითმფრინავზე „არავითარი დამაზიანებელი ზემოქმედება“ არ ყოფილა.
რუსული მედია ანონიმურ წყაროებზე დაყრდნობით იტყობინება, რომ თვითმფრინავი კლდეებში ჩავარდა. ოფიციალური ვერსიით, Ан 26 ყირიმში ტექნიკური გაუმართაობის გამო ჩამოვარდა.
