თურქეთის თავდაცვის სამინისტროს ცნობით, შავ ზღვაზე უკონტროლო დრონი ჩამოაგდეს.
სამინისტროს განცხადებაში, რომელსაც თურქული ახალი ამბების სააგენტო „ანადოლუ“ ავრცელებს, ნათქვამია, რომ შავი ზღვიდან თურქეთის საჰაერო სივრცეს მიახლოებული ობიექტი დაფიქსირდა და აღმოჩენის შემდეგ, იგი სტანდარტული პროცედურების შესაბამისად იქნა ჩამოგდებული.
„ანადოლუ“ წერს, რომ თურქეთის საჰაერო სივრცის უსაფრთხოების უზრუნველსაყოფად რეაგირება დაევალა როგორც თურქეთის, ასევე ნატოს კონტროლის ქვეშ მყოფ F-16 გამანადგურებლებს.
„დადგენილ იქნა, რომ აღნიშნული საჰაერო ობიექტი იყო უპილოტო საფრენი აპარატი, რომელიც კონტროლიდან იყო გასული. ნეგატიური შედეგის თავიდან ასაცილებლად, ის დასახლებული პუნქტების მოშორებით, უსაფრთხო ადგილას იქნა ჩამოგდებული“, – ნათქვამია თურქეთის თავდაცვის სამინისტროს განცხადებაში.
