აჭარის მთავრობა 118 ათას ლარად მსუბუქი ავტომობილის შესყიდვას გეგმავს. ავტომობილი უნდა იყოს მაღალი გამავლობის, ახალი, 2025 წელს გამოშვებული, ვერცხლისფერი ან რუხი.
ავტომობილის შესყიდვაზე აჭარის მთავრობის აპარატმა ტენდერი 118 ათას 125 ლარით გამოაცხადა. წინადადებების მიღება 2025 წლის 17 ივნისს დაიწყება და 19 ივნისს დასრულდება.
ტენდერში გამარჯვებულმა მთავრობის აპარატს ავტომობილი უნდა მიაწოდოს ხელშეკრულების გაფორმებიდან 150 დღეში, მაგრამ არაუმეტეს 2025 წლის 20 დეკემბრისა.
ტენდერს თან ახლავს შესასყიდი ავტომობილის ტექნიკური მახასიათებლები, თუმცა აღნიშნულია, რომ ამ მახასიათებლებში „მითითებულია მინიმალური მოთხოვნები, რომელსაც უნდა აკმაყოფილებდეს შემოთავაზებული საქონელი. პრეტენდენტს შეუძლია გაუმჯობესებული მახასიათებლების მქონე საქონლის შემოთავაზება“.
მახასიათებლები ავტომობილის, რომელიც აჭარის მთავრობამ უნდა შეისყიდოს / წყარო: ტენდერი
აღნიშნულ მახასიათებლებს თან ახლავს განმარტება, რომ „შემოთავაზებული ავტომობილი არის ახალი, არაუადრეს 2025 წლის გამოშვების, მარცხენა საჭიანი, ექსპლუატაციაში არმყოფი [გარბენი არაუმეტეს 200 კმ], ნივთობრივად და უფლებრივად უნაკლო და განბაჟებული.
პრეტენდენტი წინადადების ფასში ითვალისწინებს საქართველოს კანონმდებლობით განსაზღვრული ყველა სახის გადასახადს, მოსაკრებლის ჩათვლით, მათ შორის, განბაჟებისა და სახელმწიფო რეგისტრაციის [შემსყიდველზე გადაფორმებისა და სტანდარტული ფასის სახელმწიფო სანომრე ნიშნების ჩათვლით] ხარჯს“.
აჭარის მთავრობის აპარატმა ტენდერი დღეს, 11 ივნისს გამოაცხადა. შესყიდვების პორტალზე ატვირთულია სატენდერო კომისიის ოქმი, რომელიც ასევე 11 ივნისით არის დათარიღებული და სადაც აღნიშნულია, რომ ავტომობილის შესყიდვა შეთანხმებულია სახელმწიფო შესყიდვების სააგენტოსთან და საქართველოს მთავრობასთან.
„აჭარის მთავრობის აპარატის 2025 წლის შესყიდვების წლიური გეგმით გათვალისწინებულია მთავრობის აპარატისათვის მაღალი გამავლობის მსუბუქი ავტომობილის სახელმწიფო შესყიდვა… ჩატარებული იქნა ბაზრის კვლევა და წარმოდგენილია შემოთავაზებები ინვოისების სახით.
შესყიდვების განხორციელების დაწყებამდე აუცილებელი იყო მისი სახელმწიფო შესყიდვების სააგენტოსთან შეთანხმება, რაც განხორციელდა და უკვე მიღებულია თანხმობა. წერილში აღნიშნულია, რომ ტენდერით გათვალისწინებული საქონლის შესყიდვა ამ ეტაპზე არ წარმოადგენს კონსოლიდირებული ტენდერებით განსაზღვრულ შესყიდვის ობიექტს.
გარდა ამისა შესყიდვების პროცედურების დაწყებამდე, 2025 წლის 4 ივნისის საქართველოს მთავრობის ადმინისტრაციას წარედგინა დოკუმენტაცია შესყიდვის განხორციელების მიზნით წინასწარი თანხმობის მისაღებად. ადმინისტრაციის 9 ივნისის მომართვის თანახმად გაიცა დადებითი რეკომენდაცია მაღალი გამავლობის მსუბუქი ავტომობილის 118 125 ლარად ელექტრონული ტენდერის საშუალებით შეძენასთან დაკავშირებით,“ – აღნიშნულია აჭარის მთავრობის აპარატის სატენდერო კომისიის 11 ივნისის ოქმში.
