გერმანიის კანცლერმა ფრიდრიხ მერცმა განაცხადა, რომ რუსეთის წინააღმდეგ ევროკავშირის სანქციების ახალ, მე-17 პაკეტს 20 მაისს განიხილავენ.
„სანქციების ახალი პაკეტი მზადაა. გადაწყვეტილებას სამშაბათს, ბრიუსელში მივიღებთ“, – წერს მერცი სოციალურ ქსელ X-ზე.
მერცი ასევე აცხადებს, რომ რუსეთის ლიდერმა ვლადიმერ პუტინმა რუსეთსა და უკრაინას შორის მოლაპარაკებებზე სტამბოლში ჩასვლაზე უარის თქმით თავი არახელსაყრელ მდგომარეობაში ჩაიგდო.
„ის ფაქტი, რომ პრეზიდენტი ზელენსკი სტამბოლში ჩავიდა, უზარმაზარი ჟესტია. პუტინი არ გამოჩენილა – ის არასწორად მოიქცა“, – წერს მერცი.
დღეს, 16 მაისს, სტამბოლში იწყება მოლაპარაკებები რუსეთსა და უკრაინას შორის. მიუხედავად ზელენსკის შეთავაზებისა, შემდგარიყო პირისპირ მოლაპარაკება მასსა და პუტინს შორის, პუტინი თურქეთში არ ჩავიდა. მეტიც, რუსეთის დელეგაციაში არ შედის რუსეთის საგარეო საქმეთა მინისტრი, ლავროვი.
______________
ფოტო: ევროპის პრესფოტო სააგენტო. EPA-EFE/OLIVIER HOSLET
