16 მაისს ბათუმში მზია ამაღლობელის სასამართლო პროცესზე დასასწრებად ჩამოდის ავსტრიელი ევროპარლამენტარი „მწვანეთა პარტიიდან“, ლენა შილინგი.
მზია ამაღლობელის სასამართლო პროცესის შემდეგ ლენა შილინგი პრესკონფერენციას გამართავს ჟურნალისტებისათვის.
„ხვალ ჩავდივარ ბათუმში, ქართველი ჟურნალისტის, მზია ამაღლობელის სასამართლო პროცესზე დასასწრებად. მისი დაკავება საქართველოში არსებული რეპრესიების სიმბოლოა.
მზია სასამართლოშია იმის გამო, რომ ის კრიტიკული ჟურნალისტია და ეს თითოეულ ჩვენგანს უნდა აწუხებდეს. სინამდვილეში, მას რაიმე დანაშაულისთვის კი არა, ასამართლებენ იმის გამო, რომ მან ხმა აიმაღლა და უარი თქვა უსამართლობის წინაშე გაჩუმებულიყო.
ამიტომ ვიქნები ხვალ ბათუმში, რათა გვერდით დავუდგე მზია ამაღლობელს და ყველას, ვინც საქართველოში თავისუფლებისთვის იბრძვის.
ჩემთვის, როგორც ევროპარლამენტის წევრისთვის, ცხადია, რომ საქართველო ევროპის ნაწილია, თუმცა დღევანდელი რეჟიმის პირობებში, რომელიც არღვევს ადამიანის უფლებებს და ახშობს პრესის თავისუფლებას, მისი ადგილი ევროკავშირში ვერ იქნება.
როცა ჟურნალისტებს აპატიმრებენ და აჩუმებენ – საფრთხე ემუქრება თავად დემოკრატიას.
როგორც ევროპარლამენტის წევრმა, მინდა ვთქვა: ევროპა გიყურებთ. ჩვენ ამაზე თვალს არ დავხუჭავთ“ – აცხადებს ლენა შილინგი.
ავსტრიელი ევროპარლამენტარი ამბობს, რომ საკუთარ პასუხისმგებლობად მიიჩნევს შესაძლებლობების გამოყენებას ყველა იმ ადამიანის მხარდასაჭერად, რომელიც დემოკრატიისა და ადამიანის უფლებებისთვის იბრძვის.
ევროპარლამენტარმა პეტიციაც შექმნა მზია ამაღლობელის გათავისუფლების მოთხოვნით, რომელზე ხელის მოწერაც მთელი მსოფლიოდან შეუძლიათ მსურველებს. პეტიცია ორენოვანია და მისი ტექსტი ხელმისაწვდომია როგორც ინგლისურად, ისე გერმანულად.
