თურქეთის კატასტროფებისა და საგანგებო სიტუაციების მართვის სამსახურის ცნობით, 23 აპრილს, სტამბოლში, 6,2 მაგნიტუდის სიმძლავრის მიწისძვრის შემდეგ კიდევ 184 ბიძგი დაფიქსირდა.
სტამბოლში 6,2 მაგნიტუდის მიწისძვრა მოხდა ზედაპირიდან დაახლოებით 7 კილომეტრის სიღრმეზე და საშუალოდ გაგრძელდა 13 წამი. სპეციალისტების ცნობით, მცირე ბიძგები შემდეგ დღეებშიცაა მოსალოდნელი.
სპეციალისტები მოსახლეობას მოუწოდებენ, არ შევიდნენ სარისკოდ მიჩნეულ შენობებში და მოქალაქეები, რომლებსაც ეჭვი ეპარებათ შენობის სიმყარეში, 112-ს უნდა დაუკავშირდნენ.
თურქული მედიის ცნობით, ქვეყნის ჯანდაცვის მინისტრმა ქემალ მემისოღლუმ განაცხადა, რომ 23 აპრილს, მიწისძვრის შედეგად გამოწვეული პანიკური ინციდენტების გამო, სტამბოლში სულ მცირე 236 ადამიანი დაშავდა და არც ერთი მათგანის სიცოცხლეს საფრთხე არ ემუქრება.
ოფიციალური ცნობები მიწისძვრის შედეგად გამოწვეული მნიშვნელოვანი ნგრევისა და მსხვერპლის შესახებ არ გავრცელებულა.
