თურქეთში, კარტალკაიას სათხილამურო კურორტზე, 11-სართულიან სასტუმროში გაჩენილმა ხანძარმა, ბოლო ცნობებით, 76 ადამიანის სიცოცხლე იმსხვერპლა, 51 ადამიანი დაშავდა.
ბოლუს პროვინციაში მდებარე კურორტზე ხანძარი 21 იანვარს 11-სართულიან სასტუმროში გაჩნდა. ოფიციალური ცნობებით, ხანძარი 161-ნომრიანი სასტუმროს მეოთხე სართულზე გაჩნდა და ხანძრის ჩაქრობა გართულდა სასტუმროს კლდეზე მდებარეობის გამო.
მეხანძრეები ცეცხლს 10 საათის განმავლობაში აქრობდნენ.
თურქული მედია წერს, რომ ხანძარი დაემთხვა თურქეთში სასკოლო არდადეგებს, როცა ზამთრის კურორტებს ბევრი ადამიანი სტუმრობს. ტელევიზიით გავრცელდა კადრები, თუ როგორ ცდილობდნენ სასტუმროში მყოფები ხანძრისთვის თავი დაეღწიათ თოკებითა და გადაბმული ზეწრებით.
დღეს, 22 იანვარს, თურქეთში გლოვის დღე გამოცხადდა.
ოფიციალური ცნობებით, დაიწყო გამოძიება – დაკავებულია 4 პირი, მათ შორის სასტუმროს მფლობელი.
_______________
ფოტო: სააგენტო „ანადოლუ“/aa.com.tr
