თბილისის საქალაქო სასამართლომ წარმოებაში მიიღო 2023 წელს „რუსული კანონის“ წინააღმდეგ გამართული აქციების გაშუქებისას დაზარალებული 18 ჟურნალისტისა და ოპერატორის სარჩელი. საქმეს სასამართლოში “მედიაომბუდსმენი” უძღვება.
„მედიაომბუდსმენის“ დახმარებით, მოსარჩელეები ითხოვენ საქართველოს შინაგან საქმეთა სამინისტრომ ჟურნალისტებსა და ოპერატორებს აუნაზღაუროს მიყენებული მორალური ზიანი.
„აქციების გადაღების დროს ჟურნალისტები და ოპერატორები ფიზიკური და სიტყვიერი ძალადობის სამიზნე გახდნენ. სამართალდამცავთა მხრიდან ზეწოლა და აგრესია, მათ შორის, წიწაკის სპრეისა და წყლის ჭავლის გამოყენება, მკაფიოდ მიუთითებს იმ სისტემურ პრობლემებზე, რომლებიც ჟურნალისტური საქმიანობის ნაწილია საქართველოში.
სპეციალურმა საგამოძიებო სამსახურმა დაიწყო დაუყოვნებლივ გამოძიება, თუმცა დამნაშავე პირები ამ დრომდე არ გამოვლენილან და შესაბამისი პასუხისმგებლობის დაკისრების საკითხი ბუნდოვანია,“- ნათქვამია „მედიაომბუდსმენის“ განცხადებაში.
„მედიაომბუდსმენის“ ცნობით, ეს სასარჩელო დავა სიტყვის თავისუფლების დაცვის და ინფორმაციაზე ხელმისაწვდომობის უფლების შენარჩუნების კიდევ ერთი სამართლებრივი მცდელობაა.
„შესაბამისად, სარჩელის დროულად განხილვა და მოთხოვნათა სრულად დაკმაყოფილება საზოგადოებრივი უსაფრთხოების, ადამიანის უფლებების დაცვისა და ჟურნალისტური თავისუფლების უზრუნველყოფის კონტექსტში განსაკუთრებულ დატვირთვას ატარებს,“ – ნათქვამია განცხადებაში.
მთავარი ფოტო: 2023 წელს რუსული კანონის აქციების დარბევის შესახებ მომზადებული “მედიაომბუდსმენის” ანგარიშიდან
