Batumelebi | დეპუტატების ბრიფინგი ვიცე-სპიკერის სახლში დეპუტატების ბრიფინგი ვიცე-სპიკერის სახლში – Batumelebi
RU | GE  

დეპუტატების ბრიფინგი ვიცე-სპიკერის სახლში

 

დღეს, 16 მარტს, უმაღლესი საბჭოს ორმა დამოუკიდებელმა დეპუტატმა, მედეა ვასაძემ და ჯემალ ფუტკარაძემ საქართველოს პარლამენტის ვიცე-სპიკერის მურმან დუმბაძის სახლში ბრიფინგი გამართეს. მათი განცხადების მიზეზი  „თავისუფალი თაობის“ წევრების მხრიდან  „ქართული ოცნებიდან“ წასული დეპუტატების ფიზიკური და კერძო საკუთრების ხელყოფის დაანონსება იყო. გუშინ „თავისუფალი თაობის“ წევრებმა ჯემალ ფუტკარაძის სახლზე წარწერები გააკეთეს. მათ შორის იყო წარწერა – „მოღალატე“.  გუშინვე „თავისუფალი თაობის“   წევრებმა  საქართველოს პარლამენტის წევრის, მურმან დუმბაძის ოჯახთან სტუმრობაც დააანონსეს.    

 

ბრიფინგი მურმან დუმბაძის სახლში

 

„გუშინდელი შემთხვევა იყო ჩემთვის და ჩემი მეგობრებისთვის ძალიან მტკივნეული. 52 წლის ვარ და ასეთი, ოჯახთან დაკავშირებული შეურაცხყოფა არასდროს მოუყენებიათ. შეურაცხყოფა მომაყენეს ახალგაზრდებმა,  რომლებიც შემოიჭრნენ ჩემს ოჯახში და შეურაცხყოფა მიაყენეს ჩემს საკუთრებას, რომელიც კონსტიტუციით არის დაცული. კედლებზე ჩემი და ჩემი ოჯახისთვის  შეურაცხმყოფელი წარწერები დატოვეს“.

 

ჯემალ ფუტკარაძის განცხადებით, დეპუტატების წინააღმდეგ ახალგაზრდების ჯგუფი მმართველი პარტიის მიერ იქნა წაქეზებული:  

 

„ეს ახალგაზრდები იყვნენ ისინი, ვისაც  გუშინდელ განცხადებაში „ქართული ოცნების“ პოლიტსაბჭომ  მიუთითა, რომ განსხვავებული აზრი, რომელიც გააჩნიათ პარტიის ყოფილ წევრებს  მურმან დუმბაძეს, მედეა ვასაძეს და ჯემალ ფუტკარაძეს, არის დასაგმობი და ჩვენ ვართ მოღალატეები. მიუთითა, რომ მოღალატეები უნდა დაისაჯონ“.

 

მედეა ვასაძე კი აცხადებს, რომ დღეს ხელისუფლება ოპონენტებს ბოლშევიკური მეთოდებით ებრძვის:

 

„მე მოვუწოდებ „ქართულ ოცნებას“ თავი შეიკავონ მსგავსი ბოლშევიკური სულისკვეთების მქონე განცხადებებისგან. საუბარია ღალატზე, ლუსტრაციაზე. დიახ, ჩვენ კიდეც ერთხელ  გამოვამჟღავნეთ ლუსტრაციით ის ფაქტი, რომ არ ვიყიდებით“.  

 

დეპუტატები აცხადებენ, რომ „თავისუფალი თაობის“ წევრები, კიდევ ერთი დეპუტატის, სვეტლანა კუდბას ოჯახზეც აპირებენ თავდასხმას. 

 

მედეა ვასაძის განცხადებით, „ქართული ოცნება“ აგრძელებს თანამშრომლობას „ნაციონალურ მოძრაობასთან“ და ფაქტად დეპუტატებზე თავდასხმის და საკუთრების ხელყოფის ფაქტები მოჰყავს. 

 

„შესაბამისი უწყებები არ ფაქტებზე არ რეაგირებენ. აჭარის სამმართველოს უფროსად გიორგი პაპუაშვილის დანიშვნა კი, სწორედ ამის მანიშნებელია. პაპუაშვილი ჩვენს რეგიონში ასოცირდება 2004-05 წლებში მიმდინარე ცუდ პროცესებთან. ის მოიაზრება გია გეწაძესთან დაახლოებულ პირად, მის უახლოეს მეგობრად. ამიტომ ახალგაზრდებს ვურჩევდი ამ საკითხებზე გაამახვილონ ყურადღება“.

 

„ბათუმელების“ კითხვაზე, ხომ არ უკავშირდება ეს პროცესები უმაღლესი საბჭოს თავმჯდომარის ავთანდილ ბერიძის თანამდებობიდან გადაყენების საკითხის დაანონსებას? – უმაღლესი საბჭოს დეპუტატები აცხადებენ რომ, კი.  „ჩვენ აუცილებლად დავაყენებთ, ავთანდილ ბერიძის თანამდებობიდან გადაყენების საკითხს“ – აცხადებენ ისინი.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე