„სადავო უძრავი ქონების რეგისტრაციის დროს უპირატესობა ბინის თავდაპირველ მესაკუთრეს მიენიჭება და არა თაღლითური გზით გასხვისებულ, მაგრამ კეთილსინდისიერ შემძენს,“ – ამბობს „კონსტიტუციის 42-ე მუხლის“ იურისტი არჩილ ჩოფიკაშვილი. იგი მოქალაქე ნოდარ დვალის ინტერესებს იცავს, რომლის სარჩელიც დღეს, 17 ოქტომბერს საკონსტიტუციო სასამართლოს პლენუმმა დააკმაყოფილა.
არჩილ ჩოფიკაშვილი განმარტავს, რომ ბოლო დროს ქვეყანაში არაერთი მოქალაქე გახდა თაღლითური სქემის მსხვერპლი. „ყველა ასეთ შემთხვევაში, სასამართლო უპირატესობას ანიჭებდა ბინის კეთილსინდისიერ შემძენს და კანონიერი მესაკუთრე ქუჩაში რჩებოდა,“ – დასძენს არჩილ ჩოფიკაშვილი.
საკონსტიტუციო სასამართლოს განმარტებით, უძრავი ქონების თავდაპირველ მესაკუთრეს უნდა ჰქონდეს უპირატესობა, თუკი კეთილსინდისიერი შემძენისთვის ცნობილი იყო, რომ მიმდინარეობდა დავა საჯარო რეესტრის ჩანაწერთან დაკავშირებით.
თუკი ბინის კეთილსინდისიერი შემძენისთვის დავის არსებობის შესახებ უცნობი იყო, მაშინ მასზე და თავდაპირველ მესაკუთრეზე თანაბრად ნაწილდება სასამართლოში მტკიცების ტვირთი.
