ნეტგაზეთი • RU

მურმან დუმბაძე: ივანიშვილი გამებუტა

 

საქართველოს პარლამენტის ვიცე-სპიკერმა, ბათუმის მაჟორიტარმა დეპუტატმა მურმან დუმბაძემ „ბათუმელებთან“ ინტერვიუში აღნიშნა, რომ ყოფილ პრემიერ-მინისტრთან, ბიძინა ივანიშვილთან ბათუმში მეჩეთის აშენების თემასთან დაკავშირებით დაეძაბა ურთიერთობა. „ივანიშვილი გამებუტა“ – აღნიშნა მურმან დუმბაძემ. 

მურმან დუმბაძე

„2013 წლის თებერვალში საგარეო საქმეთა სამინისტროს პირველი ოფიციალური ვიზიტი თურქეთის რესპუბლიკაში ჰქონდა. როცა მაია ფანჯიკიძე ტრაპიდან ჩამოვიდა, მაშინვე გააკეთა განცხადება ბათუმში მეჩეთის მშენებლობაზე და თქვა, რომ აჭარლებიც ქართველები არიან და მათ აქვთ უფლება ბათუმში ააშენონ მეჩეთი. როცა ბიძინა ივანიშვილს პოლიტსაბჭოს სხდომაზე შევხვდი, ვუთხარი თქვენი მთავრობის წევრმა ძალიან უგუნური განცხადება გააკეთა-მეთქი. მერე, რა, ეს ხომ მართლა ასეაო, – მითხრა. მაშინ მე დავარტყი მაგიდაზე ხელი და ვთქვი, რომ მეჩეთი ვერ აშენდებოდა. სხდომის შემდეგ კიდევ გვქონდა ცალკე საუბარი, სადაც ხმამაღალ საუბრამდე მივიდა საქმე. ამის შემდეგ ივანიშვილი გამებუტა და კავშირი გაწყდა“ – განაცხადა მურმან დუმბაძემ „ბათუმელებთან“.

მურმან დუმბაძე 2012 წლის არჩევნებამდე ბათუმში აზიზიეს მეჩეთის მშენებლობის საწინააღმდეგო აქციების ერთ-ერთი ორგანიზატორი და მონაწილე იყო. არჩევნების შემდეგ, 2013 წლის თებერვალში წინ დუმბაძემ „ნეტგაზეთთან“ განაცხადა, რომ არ არის მეჩეთის აშენების წინააღმდეგი, თუ ამას ქართველი მუსლიმები მოითხოვენ. 

“ბათუმელების” სრული ინტერვიუ პარლამენტის ვიცე-სპიკერთან – მურმან დუმბაძე: თანამდებობას ავთანდილ ბერიძეც დატოვებს – რომელიც აჭარის უმაღლეს საბჭოში გავითარებულ მოვლენებს შეეხება, იხილეთ „ნეტგაზეთზე“.  

ნეტგაზეთის მასალების სხვა გამოცემებში გადაბეჭდვის წესი
"ბათუმელები"