Batumelebi | ხუთი ხანძარი ერთ დღეს – სახანძრო სამსახურის უფროსის რეკომენდაცია ხუთი ხანძარი ერთ დღეს – სახანძრო სამსახურის უფროსის რეკომენდაცია – Batumelebi
RU | GE  

ხუთი ხანძარი ერთ დღეს – სახანძრო სამსახურის უფროსის რეკომენდაცია

 

ბოლო კვირის მანძილზე აჭარაში რამდენიმე ხანძარი მოხდა, გუშინ, 2 თებერვალს, კი აჭარაში მეხანძრეებმა ოთხი ხანძარი ჩააქრეს. რა ხდება ხანძრის გამომწვევი მიზეზი და რას ურჩევენ მეხანძრეები მოსახლეობას?  – „ბათუმელები“  სახანძრო დაცვისა და საგანგებო სიტუაციათა სამსახურის უფროსს, ხუსეინ სირაბიძეს ესაუბრა. 

 

ბატონო ხუსეინ, რა ფართობი დაიწვა გუშინდელი ხანძრის შედეგად გონიოსთან?


გუშინ ღამევე ჩავაქრეთ ხანძარი. ღამის ორ საათზე უკვე ლიკვიდირებული იყო. 50 ჰექტრამდე იყო ფართობი, მაგრამ ფაქტობრივად დაიწვა ეკალ-ბარდი, მოსახლეობა არ დაზარალებულა. ეს იყო ძველი ჩაის პლატაციები, მაგრამ ამჟამად იქ მხოლოდ გვიმრა და ეკალ-ბარდია.


ბოლო დღეების მანძილზე ეს უკვე მერამდენე ხანძარია. რა ხდება ხანძირს გამომწვევი მიზეზი?

 

მიზეზებზე საუბარი ჩემი პრეროგატივა არ არის, ამას მოკვლევა სჭირდება, რასაც შინაგან საქმეთა სამინისტრო აკეთებს, მაგრამ ხანძრის მიზეზი, ძირითადად, მოსახლეობის დაუდევრობაა. წუხელ ქარი იყო ძლიერი და ამიტომაც გართულდა ხანძრის ჩაქრობა.

 

როგორც ვიცით, წუხელ მაღალმთიან აჭარაშიც იყო ხანძარი…


დიახ, გუშინ ხანძარი იყო შუახევში, სოფელ კობალთაში, სადაც სახლი დაიწვა და დამხმარე ნაგებობები, გარდა ამისა იყო ხანძარი ცინარეთში (შუახევი) – იქაც ეკალ-ბარდი იწვოდა, იგივე იყო ქედაში, სოფელ ახოში და ჩაქვში, ჩაისუბანში.  

 

როგორ მუშაობთ, დამატებითი ძალები გჭირდებათ ასეთ ვითარებაში?


მობილიზებული ვართ და ვახერხებთ სწრაფად რეაგირებას. ჯერ-ჯერობით რეგიონებიდან დახმარება არ დაგვჭირვებია.

 

ამ სეზონზე იმატებს ხანძრის შემთხვევები?


დიახ. ახლა მოსახლეობა ამუშავებს საყანე ნაკვეთებს, ასუფთავებენ მიწის ნაკვეთებებს, ნაგავს ცეცხლს უკიდებენ და ვეღარ ახდენენ მერე ცეცხლის ლოკალიზებას და გადადის სხვა ნაკვეთებზეც.

 

გაქვთ რეკომენდაცია მოსახლეობისათვის? 


რეკომენდაცია რა თქმა უნდა გვაქვს. ვთხოვთ მოსახლეობას, რაც შეიძლება ფრთხილად მოეკიდონ ცეცხლის დანთებას და თუ აუცილებელია რაიმეს დაწვა, წინასწარ შეგვითანხმონ, რომ პრევენციის საშუალება გვქონდეს და ზომები მივიღოთ. ყოველთვის ვაკეთებთ ჩვენ ამას და გამგები არავინაა სამწუხაროდ.  


ბათუმის სახანძრო სამსახური
ბათუმის სახანძრო სამსახური

ნეტგაზეთის მასალების სხვა გამოცემებში გადაბეჭდვის წესი
ნანა კვაჭაძე