დაგეგმილი მშენებლობა ბათუმში, “სოკოს სახლის” გვერდით [ფოტო]

ბათუმში ე.წ. „სოკოს“ სახლის გვერდით, მაზნიაშვილის #34-ში კომპანია „მარდი ჰაუსი“ საცხოვრებელი სახლის რეკონსტრუქციის ხარჯზე მრავალბინიანი საცხოვრებელი სახლის მშენებლობას გეგმავს. მშენებელმა პროექტი შესათანხმებლად კულტურული მემკვიდრეობის სააგენტოს ზონალურ საბჭოს მიმართა.

ე.წ „სოკოს“ სახლში ახლა ცვილის ფიგურების მუზეუმია, რომელიც უკვე ხუთ წელზე მეტია დაკეტილია. შენობა  კულტურული მემკვიდრეობის ძეგლია.

კანონმდებლობა ძეგლიდან  150 მეტრის რადიუსში კრძალავს ისეთ მშენებლობას, რომელიც ძეგლს დაჩრდილავს.

ბათუმის მერიის არქიტექტურის სამსახურის უფროსი ირაკლი ახალაძე ამბობს, რომ ამ პროექტის მიმართ საბჭოს ყველა წევრს უარყოფითი დამოკიდებულება აქვს. ზონალური საბჭოს სხდომაზე პროექტის მიმართ უარყოფითად ისაუბრეს საზოგადოება „ბათომის“ წევრებმაც. პროექტის მოწინააღმდეგეები მიიჩნევენ, რომ ახალი პროექტი  მისი განხორციელების შემთხვევაში „ძეგლის დაკნინებას გამოიწვევს“.

ზონალური საბჭოს სხდომა

პროექტის ერთ-ერთი არქიტექტორი ბექა თევდორაძე ამტკიცებს, რომ პროექტი ძეგლის აღქმას ხელს არ შეუშლის.

„…იმ მოცემულობის შესაბამისად, რაც დაგვხვდა, ბევრი ვიფიქრეთ, როგორ გაგვეკეთებინა პროექტი ისე, რომ მას ძეგლის აღქმისთვის ქუჩის ორივე მხრიდან ხელი არ შეეშალა. ძეგლის გვედით ორსართულიანი სახლია, მის გვერდით კი კიდევ ერთი ძველი სახლი, ამ სახლის გვერდით კი ახალი სახლი, რომელიც ისე აუშენებიათ, რომ გვერდითა სახლის სიმეტრიები არ გაუთვალისწინებიათ. ამიტომ ჩვენ გვქონდა ამოცანა, პროექტი ისე გაგვეკეთებინა, რომ მაქსიმალურად შეგვენარჩუნებინა ავთენტურობა და დაგვემატებინა ახალი დეტალებიც, დაგვეცვა სიმეტრიები და სიმაღლე. გარდა ამისა, ძეგლის აღქმისთვის ხელი არ უნდა შეეშალა. ამიტომ ძეგლის მხარეს დახრილი კედელი გავაკეთეთ“, – ამბობს ბექა თევდორაძე.

პროექტი ოთხსართულიანი საცხოვრებელი სახლის მშენებლობას ითვალისწინებს, პირველ სართულზე კომერციული ფართობითა და ღია კაფით. პროექტის ავტორის თქმით, იმ ორსართულიანი სახლიდან, რომლის რეკონსტრუქციის ხარჯზეც მშენებლობა იგეგმება, პროექტი მხოლოდ ფასადის შენარჩუნებას ითვალისწინებს:

„… იმისათვის, რომ ახალი ფასადი მაქსიმალურად ადაპტირებულიყო არსებული ქუჩის განშლასთან, შევქმენით ერთგვარი ბადე, რომელიც იმეორებს ქუჩის რითმს, როგორც ვერტიკალურად ისე ჰორიზონტალურად“.

ზონალურმა საბჭომ პროექტი არ დაამტკიცა. კომპანიაში მიიჩნევენ, რომ საბჭოსთვის პროექტის წარდგენისა და ახსნის საშუალება რომ მისცემოდათ ავტორებს, შესაძლოა მათ სხვა გადაწყვეტილება მიეღოთ. კომპანია გეგმავს საბჭოს კიდევ ერთხელ მიმართოს.

კულტურული მემკვიდრეობის ძეგლი ძველ ბათუმში, სადაც ახლა ცვილის ქანდაკებების მუზეუმი, ცნობილ ვაჭარს, თამბაქოს მრეწველ ლაზარე ბინიათოღლის ბათუმში, XIX საუკუნის ბოლოს აუშენებია.