Batumelebi | ბათუმის აეროპორტში თურქეთის ინტერპოლის მიერ ძებნილი პირი დააკავეს ბათუმის აეროპორტში თურქეთის ინტერპოლის მიერ ძებნილი პირი დააკავეს – Batumelebi
RU | GE  

ბათუმის აეროპორტში თურქეთის ინტერპოლის მიერ ძებნილი პირი დააკავეს

 

საქართველოში ინტერპოლის ეროვნული ცენტრალური ბიუროს თანამშრომლებმა, სასაზღვრო სამიგრაციო კონტროლის განყოფილება „ბათუმის აეროპორტში“ 21 იანვარს ბელორუსიდან საქართველოს სახელმწიფო საზღვრის კვეთის დროს თურქეთის რესპუბლიკის სამართალდამცავი ორგანოების მიერ ძებნილი, საფრანგეთის რესპუბლიკის მოქალაქე, 1977 წელს დაბადებული ჰალის აიდოგანი (Halis Aydogan) დააკავეს – ინფორმაციას ამის შესახებ შს სამინისტრო ავრცელებს. 

 

ბათუმის საერთაშორისო აეროპორტი
ბათუმის საერთაშორისო აეროპორტი

ანკარას ინტერპოლის მიერ ჰალის აიდოგანი, მისი დაკავების და შემდგომი ექსტრადიციის მიზნით, საერთაშორისო ძებნაში 2010 წლის 16 აპრილს გამოცხადდა. მას ბრალად ედება თურქეთის რესპუბლიკის სისხლის სამართლის კოდექსის 146/3-ე, 59/2-ე, 31-ე და 33-ე მუხლებით და თურქეთის ანტიტერორისტული კანონის მე-5 მუხლით გათვალისწინებული დანაშაულების ჩადენა, რაც ჯგუფის მიერ ძალის გამოყენებით კონსტიტუციური წყობილების შეცვლის მცდელობაში მონაწილეობას გულისხმობს.

 

შს სამინისტროს ცნობით დაკავებული გადაყვანილია აჭარა-გურიის დროებითი მოთავსების იზოლატორში. მის მიმართ კანონით გათვალისწინებული წინა საექსტრადიციო პროცედურები მიმდინარეობს. 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"