22 იანვარს ბათუმში, „ნაციონალური მოძრაობის“ ოფისში „ბათუმის განგსტერული ქრონიკა“ – ბოლო ხანს მომხდარი კრიმინალური ამბების ჩამონათვალი წარმოადგინეს. პარლამენტის წევრმა, შუახევის მაჟორიტარმა დეპუტატმა ომარ მეგრელიძემ განაცხადა, რომ ბოლო დროს კრიმინალმა იმატა და გახმაურებული საქმეები დღემდე გამოუძიებელია.
ომარ მეგრელიძე
„გვახსოვს ყველას დიასამიძის ბავშვის უგზო-უკვლოდ გაქრობა, რომელიც დღემდე გამოუძიებელია, ახლა ერთი კვირის განმავლობაში ერთმანეთის მსგავსი ორი დანაშაული მოხდა: დაუწვეს მანქანა ბიზნესმენ ფარცვანიას, გუშინ კიდევ მანქანა დაუწვეს მანჯავიძეს. კრიმინალს არა აქვს პარტიულობა, ეს ეხება ყველას. ჩვენ როცა წავედით ხელისუფლებიდან, დავტოვეთ ქალაქი აღჭურვილი იმ ვიდეოსაშუალებებით, რომლითაც ძალიან იოლად შეიძლება გაიხსნას ესა თუ ის დანაშაული, მაგრამ სამწუხაროდ ამას ვერ ვხდავთ. ეს არ არის 90-იანი წლები, უკან ვერ დავბრუნდებით. მე ვერ დავდებ სამართალდამცავებს ბრალს, მაგრამ ბევრი საკითხი ეჭვს ბადებს, შეიძლება გარკვეულ დამნაშავეებს ჰყავთ მფარველები რაღაც დონეზე, ამას პასუხი უნდა გასცენ კომპეტენტურმა პირებმა“ – განაცხადა ომარ მეგრელიძემ.
კითხვაზე, რა არის მისთვის ცნობილი დათო მანჯავიძის მანქანის დაწვასთან და „ნაციონალურ მოძრაობას“ შორის კავშირზე [დათო მანჯავიძემ ჟურნალისტებთან განაცხადა, რომ მომხდარს გივი თარგამაძესთან მეგობრობას უკავშირებს], ომარ მეგრელიძემ განაცხადა, რომ ამ ინფორმაციას ვერ დაადასტურებს:
„მე ტელევიიზით მოვისმინე ეს ინფორმაცია, ამას ვერც უარვყოფ, ვერც დავადასტურებ, შეიძლება ასეც იყოს, რადგან ამ ადამიანმა ასე თქვა, მაგრამ ეჭვის დონეზე მე ვერ ვიტყვი ვერაფერს“ – აღნიშნა მან.
