ბათუმის თოჯინების და მოზარდმაყურებელთა თეატრს ახალი დირექტორი ეყოლება. ამ პოზიციაზე თეატრის ახალმა სამხატვრო ხელმძღვანელმა, გიორგი ჩხაიძემ თემურ მახარაძის კანდიდატურა წარუდგინა აჭარის განათლების მინისტრს, რომელმაც დირექტორის დანიშვნის შესახებ ბრძანებას უნდა მოაწეროს ხელი.
თოჯინების თეატრს ბოლო 10 წლის განმავლობაში მედეა ჩარკვიანი ხელმძღვანელობდა. თეატრის დირექტორი სამხატვრო ხელმძღვანელის უფლებამოსილების ვადით [4 წელი] ინიშნება.
29 აგვისტოს განათლების და კულტურის მინისტრმა, ინგა შამილიშვილმა თოჯინების თეატრის სამხატვრო ხელმძღვანელად, კონკურსის შედეგიდან გამომდინარე, გიორგი ჩხაიძე დანიშნა, რომელმაც მედეა ჩარკვიანის დირექტორობა აღარ ისურვა.
გიორგი ჩხაიძე აქამდე ბათუმის ექსპერიმენტულ თეატრში მუშაობდა რეჟისორად. მისთვის სასურველი დირექტორობის კანდიდატი – თემურ მახარაძე ასევე ექსპერტიმენტულ თეატრს ხელმძღვანელობდა.
კანონის მიხედვით, თეატრის დირექტორს მინისტრი ნიშნავს სამხატვრო ხელმძღვანელის წარდგინებით. გადაწყვეტილება აჭარის განათლების, კულტურის და სპორტის მინისტრს ჯერ არ მიუღია.
რა ხდება იმ შემთხვევაში, თუკი მინისტრი სამხატვრო ხელმძღვანელის მიერ წარდგენილ კანდიდატურას დაიწუნებს? – „ბათუმელების“ შეკითხვას თამარ სირიამ უპასუხა, აჭარის განათლების სამინისტროს სამართლებრივი უზრუნველყოფის დეპარტამენტის უფროსმა.
„კანონში არის ჩანაწერი, რომ დირექტორს ნიშნავს მინისტრი სამხატვრო ხელმძღვანელის წარდგინებით. მინისტრს, რა თქმა უნდა, აქვს უფლება, დაიწუნოს კანდიდატურა. ამ შემთხვევაში, სამხატვრო ხელმძღვანელმა დირექტორობის ახალი კანდიდატი უნდა წარუდგინოს მინისტრს. ეს პროცესი გაგრძელდება მანამ, ვიდრე სამხატვრო ხელმძღვანელი მინისტრს არ წარუდგენს მისთვის მისაღებ კანდიდატს,“ – განმარტავს თამარ სირია.
სამხატვრო ხელმძღვანელს უფლებამოსილების გასვლამდე ასევე შეუძლია მიმართოს მინისტრს და დირექტორის გათავისუფლება მოსთხოვოს.
„ამ შემთხვევაში ჩატარდება ადმინისტრაციული წარმოება, თუ რის გამო მოითხოვს სამხატვრო ხელმძღვანელი დირექტორის გათავისუფლებას. საბოლოო გადაწყვეტილებას აქაც მინისტრი იღებს. მინისტრს ასევე შეუძლია თავისი ინიაციტივითაც გაათავისუფლოს თეატრის დირექტორი, მაგალითად, მოკვლევის საფუძველზე,“ – გვითხრა თამარ სირიამ.
