ქედის პოლიციის სამმართველოს უფროსის მოადგილედ გიორგი ბზიშვილი დაინიშნა. ის ქედაში დეტექტივების განყოფილებას უხელმძღვანელებს. გიორგი ბზიშვილი მანამდე ახალციხეში, სამცხე-ჯავახეთის პოლიციის დეპარტამენტში მუშაობდა – ჯერ უბნის ინსპექტორების სამმართველოს უფროსის მოადგილე იყო, შემდეგ კი – ამავე სამმართველოს უფროსი.
ქედის სამმართველოს უფროსის მოადგილის შტატი მას შემდეგ იყო ვაკანტური, რაც ყოფილი მოადგილე, როსტომ ცინცაძე, რამდენიმე თვის წინ სამუშაოდ იმავე ხაზით ქობულეთის პოლიციის განყოფილებაში გადაიყვანეს.
ქედის პოლიციას დღეს გიგლა მოსიძე ხელმძღვანელობს, რომელიც პოლიციის ქედის სამმართველოს უფროსად მიმდინარე წლის აპრილის თვეში დაინიშნა. მანამდე გიგლა მოსიძე შს სამინისტროს აჭარის პოლიციის დეპარტამენტის უფროსის მოადგილედ მუშაობდა.
„ბათუმელებმა“ გიორგი ბზიშვილის დანიშვნასთან დაკავშირებით თავდაპირველად გიგლა მოსიძეს ჰკითხა, მაგრამ მან თქვა, რომ „არ სცალია“, „სხვა დროს დავურეკოთ“ და ტელეფონი გამორთო.
შინაგან საქმეთა სამინისტროს პრესსამსახურში კი გვითხრეს, რომ ნებისმიერი საკადრო ცვლილების შესახებ ინფორმაციის მისაღებად წერილობით მივმართოთ შს სამინისტროს საჯარო ინფორმაციის სამმართველოს. შესაბამისად, უწყებაში ბზიშვილის დანიშვნასთან დაკავშირებით კითხვებს არ უპასუხეს.
ამავე თემაზე: