Batumelebi | ხელისუფლებამ „ოცნების ქალაქში“ ქოხების დანომვრა დაიწყო ხელისუფლებამ „ოცნების ქალაქში“ ქოხების დანომვრა დაიწყო – Batumelebi
RU | GE  

ხელისუფლებამ „ოცნების ქალაქში“ ქოხების დანომვრა დაიწყო

 

დღეს, 15 დეკემბერს, ე.წ „ოცნების ქალაქში“ აჭარის მთავრობის წარმომადგენლები მივიდნენ. ისინი ქოხების ხელახალ ნუმერაციას აწარმოებენ.

„ჯანდაცვის მინისტრის მოადგილე, რამაზ ჯინჭარაძე და კიდევ რამდენიმე ადამიანია მოსული. დილიდან ნომრავენ ქოხებს, მათი ინფორმაციით ხელმეორედ მოხდება ამ ოჯახების მდგომარეობის შესწავლა“- ამბობს „ოცნების ქალაქში“ მცხოვრები როინ გუნდაძე.

 

 

საპროტესტო აქცია „ოცნების ქალაქში“

 

 

რესპონდენტი ამბობს, რომ მოსახლეობა ქოხების ხელახალი ნუმერაციის წინააღმდეგი არ არიან. „ჩვენ მომხრე ვართ იმის, რომ მოხდეს  ხელახალი აღრიცხვა, რომ  მთავრობამ რეალურად შეაფასოს არსებული მდგომარეობა“.

 

 როინ გუნდაძე უმაღლესი საბჭოს წევრს, მედეა ვასაძის განცხადებასაც  ეხმაურება: „უმაღლესი საბჭოს წევრმა მედეა ვასაძემ განაცხადა, რომ მხოლოდ 80 ოჯახია, ვინც რეალურად საჭიროებს საცხოვრებელსო, რასაც ბუნებრივია ჩვენ არ ვეთანხმებით. მან ისიც თქვა, რომ შუაღამით მოდიოდა და ამოწმებდა, იყვნენ თუ არა ქოხებში ადამიანები.  რატომ მოდიოდა ღამით და არა დღისით? შუაღამით ვინ უნდა ენახა, ამ დროს ადამიანებს სძინავთ და შუქიც გათიშულია. როგორ დაადგინა ქოხში იყვნენ თუ არა ადამიანები?“- ამბობს როინ  გუნდაძე.

 

„ოცნების ქალაქში“ მცხოვრებმა სოციალურად დაუცველმა ოჯახებმა მორიგი საპროტესტო აქცია შაბათს, 13 დეკემბერს გამართეს, ისინი ხელისუფლებას ახალი, ობიექტური კომისიის შექმნას და დაკავებული ფართების საკუთრებაში დაკანონებას სთხოვენ.

 

„ოცნების ქალაქში“ ამ დროისთვის 1500 -მდე ოჯახი ცხოვრობს. 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე