Batumelebi | როდის გაიხსნება ახალი რკინიგზის სადგური ბათუმში როდის გაიხსნება ახალი რკინიგზის სადგური ბათუმში – Batumelebi
RU | GE  

როდის გაიხსნება ახალი რკინიგზის სადგური ბათუმში

 

ბათუმში, თამარის დასახლებაში, ახალი რკინიგზის სადგური სექტემბერში უნდა გახსნილიყო, თუმცა მშენებლობა ჯერ კიდევ მიმდინარეობს. მშენებელმა კომპანიამ სახელმწიფოსთან დადებული პირობა დაარღვია. იმის შესახებ, რომ კომპანიის მხრიდან ნაკისრი ვალდებულების დათქმულ ვადაში შესრულების შესაძლებლობა იმ ტემპით რა ტემპითაც კომპანია სამშენებლო სამუშაოებს აწარმოებდა, საეჭვო იყო, „ბათუმელები“ 2014 წლის მარტშიც წერდა

რკინიგზის სადგურის მშენებლობა

მშენებლობას შპს „გზა“ „GEORGIA INN “-ის დაკვეთით აწარმოებს.

დაგვიანების მიზეზად მშენებელმა კომპანიამ ამჯერად ბათუმის მერიისგან მიღებული მითითებები დაასახელა. კომპანიამ დამკვეთთან, აჭარის ფინანსთა და ეკონომიკის სამინისტროსთან განმარტა, რომ მერიასთან შეთანხმებულ არქიტექტურულ პროექტში კორექტირებების შეტანა გახდა აუცილებელი.

„გათვალისწინებული იქნა მითითებები, რომლის საფუძველზეც პროექტიდან ამოღებული იქნა საფრთხის შემცველი ობიექტები, „ავტოგასამართი სადგური“ და „ავტოგაზგასამართი სადგური“, რის შედეგადაც გაიზარდა სამუშაოები, კერძოდ გაიზარდა ბაქნის მოწყობისა და სხვა სახის სამუშაოები“.

ამ სამუშაოების შესასრულებლად კომპანიამ დამატებით ექვსი თვის ვადა მოითხოვა. კომპანიას სამინისტრომ ვადა ამჯერადაც გაუხანგრძლივა და სამუშაოს დასრულების ვადად 2015 წლის 9 აპრილი განუსაზღვრა.

იმ შემთხვევაში, თუ კომპანია ნაკისრ ვალდებულებებს ისევ ვერ შეასრულებს, ნასყიდობის ხელშეკრულების თანახმად, მყიდველი მიიღებს წერილობით გაფრთხილებას, სადაც დარღვევის გამოსწორების ვადის გარდა, პირგასამტეხლოს ოდენობის შესახებაც იქნება შეტყობინება.

ასლან აბაშიძის მმართველობის პერიოდში აშენებული ეს შენობა და მასზე მიმაგრებული 22 566 კვ/მ მიწის ნაკვეთი 2009 წელს ბიზნესმენმა ემზარ ბასილაიამ 2 მილიონ 40 ათას ლარად იმ პირობით შეისყიდა, რომ რკინიგზის სადგურის დარბაზს 48 თვეში მოაწყობდა. პირობა ვერ შეასრულა. მშენებლობა ცოტა ხნის წინ კომპანია „GEORGIA INN“ -მა ემზარ ბასილაიას გარეშე განაახლა.

მრავალწლიანი პაუზის შემდეგ ახალი რკინიგზის სადგურის მშენებლობა ახალ ხელისუფლებასთან შეთანხმებით ისევ  განახლდა.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე