Batumelebi | 25 წლის პატიმარი ფსიქიატრიულ დეპარტამენტში გადაიყვანეს 25 წლის პატიმარი ფსიქიატრიულ დეპარტამენტში გადაიყვანეს – Batumelebi
RU | GE  

25 წლის პატიმარი ფსიქიატრიულ დეპარტამენტში გადაიყვანეს

 

25 წლის პატიმარი  №7 სასჯელაღსრულებითი დაწესებულებიდან ლევან სამხარაულის სახელობის ექსპერტიზის ბიუროში გადაიყვანეს.  პატიმრის ადვოკატის, მარინა კაკაურიძის ინფორმაციით,  პატიმარი ექიმების მეთვალყურეობის ქვეშ იმყოფება, ის განთავსებულია ფსიქიატრიულ დეპარტამენტში. 

 

სამხარაულის ექსპერტიზის ბიურო. ბიოლოგიური ექსპერტიზის დეპარტამენტი

 

ადვოკატი ამბობს, რომ კანონით თანახმად, პატიმარი შესაძლოა ფსიქიატრიულ დეპარტამენტში 21  დღის განმავლობაში დარჩეს, თუმცა შეიძლება ექიმებმა უფრო ადრე დაწერონ მისი ჯანმრთელობის შესახებ დასკვნა და უფრო მალე დაატოვებინონ მას სამხარაულის ექსპერტიზის ბიურო.  

 

დაწესებულებაში პატიმრის მონახულება მხოლოდ ადვოკატს შეუძლია. იმ შემთხვევაში, თუ  ექიმები პატიმარს  ფსიქიკური აშლილობის რომელიმე ფორმას  დაადგენენ, მოსამართლის ბრძანების საფუძველზე პატიმარი ფსიქიატრიულ დაწესებულებაში განთავსდება, მანამდე კი ოჯახის წევრები და პატიმრის ადვოკატი ექსპერტების დასკვნას ელოდებიან:

 

„ვნახე დღეს ჩემი დაცვის ქვეშ მყოფი, ჩემი აზრით მას რაიმე ფსიქოლოგიური პრობლემები არ აქვს.  ერთადერთი, რაც   შეიძლება  პრობლემად განვიხილოთ, არის ის, რომ  პატიმარი არ იჭრის ფრჩხილებს, მეც ვთხოვე, თუმცა უარზეა“ – ამბობს ადვოკატი.

 

პატიმარს  სხეულის სხვადასხვა ნაწილზე  სულ 80 ნაკერი ადევს. ოჯახის წევრების ცნობით, მან ბათუმის მესამე დაწესებულებაში თვითდაზიანება მიიღო, პატიმარი სწორედ მას შემდეგ გადაიყვანეს თბილისში, მეშვიდე დაწესებულებაში.

 

მეშვიდე დაწესებულების დირექტორისა და ადმინისტრაციის განცხადების საფუძველზე კი ის ახლა ფსიქიატრიულ დეპარტამენტშია გადაყვანილი.  

 

   

ნეტგაზეთის მასალების სხვა გამოცემებში გადაბეჭდვის წესი
ნათია როყვა