6 აგვისტოს გასართობ ცენტრ „ციცინათელაში“ მეორე მსოფლიო ომში საბჭოთა კავშირის გამარჯვების აღსანიშნავი სიმღერა – День Победы იყო ჩართული. „ციცინათელას“ პიარ-მენეჯერის ეკა სალუქვაძის განცხადებით, „საშინელი გაუგებრობა მოხდა“.
„ჩვენ გვყავს ახალი თანამშრომელი აყვანილი, რომელიც ძალიან გამოუცდელია სიმღერებთან დაკავშირებით, რადგან ჩვენ გვაქვს ბაზა, საიდანაც გადის ერთი და იგივე სიმღერები ყოველდღიურად. თუმცა, მოხდა ისე, რომ „ფლეილისტში“ თანამშრომელმა გადმოწერა სხვადასხვა სიმღერა, აურია და გუშინ მივიღეთ ასეთი კატასტროფული შედეგი, რომ გავიდა ეს სიმღერა,“ – ამბობს ეკა სალუქვაძე.
„ბათუმელების“ კითხვაზე, „ფლეილისტში“ რატომ იყო ეს სიმღერა, ეკა სალუქვაძე ამბობს, რომ არ იცის რატომ მოხდა ეს.
„ჩვენ თვითონ ადმინისტრაცია ვართ შოკირებული, ძალიან განვიცდით და ამ ყველაფერს დაემატა ის, რომ როცა გვქონდა სიმღერის გათიშვის მცდელობა, არ გაითიშა, რადგან სისტემა ისეთი მოწყობილია, რომ ვერ თიშავ სანამ არ დასრულდება „ფლეილისტი“, სხვანაირად რომ გათიშო – სისტემა ზიანდება. ხარვეზული პროგრამაა და ამ მხრივ არ არის გამართული, რომ უცებ გადავიდეს სხვა სიმღერაზე,“ – ამბობს ის.
ეკა სალუქვაძის თქმით, ეს პროცესი დროში გაიწელა, რადგან ადმინისტრაციის შენობაში მუსიკის ხმა არ ისმის. „შენობა არის მეტალოპლასმასის და ხმა არ შემოდის, როცა ჩვენ გავიგეთ, უკვე დაგვიანებული აღმოჩნდა,“ – ამბობს მენეჯერი.
კითხვაზე, რა ზომების გატარებას აპირებს „ციცინათელას“ ადმინისტრაცია მომხდართან დაკავშირებით, ეკა სალუქვაძე ამბობს, რომ „უშეცდომო არავინ არ არის. თუმცა რა ზომები იქნება მიღებული, ეს უკვე დირექტორის პრეროგატივაა,“ – გვეუბნება ის.
„ციცინათელა“ ასოციაცია „ატუს“ საკუთრებაშია. „საერთაშორისო გამჭვირვალობა – საქართველოს“ ინფორმაციით, ეს კომპანია ბიძინა ივანიშვილთანაა დაკავშირებული.
მთავარ ფოტოზე: ციცინათელა. ბექა კოკაიას ფოტო.
