Batumelebi | ვის ეხება გაზიფიცირების ახალი ტარიფი ვის ეხება გაზიფიცირების ახალი ტარიფი – Batumelebi
RU | GE  

ვის ეხება გაზიფიცირების ახალი ტარიფი

 

სემეკმა 3 ნოემბრის გადაწყვეტილებით განსაზღვრა გაზიფიცირებულ დასახლებათა ჩამონათვალი, რომლებზეც ვრცელდება მიერთების ახალი, იაფი ტარიფი. აჭარაში ეს ტარიფი ვრცელდება ბათუმში: ბათუმი, ადლია, ზედაღელე, თოდოგაური; ქობულეთის მუნიციპალიტეტში: ქობულეთი, ბუკნარი, საჩინო; ხელვაჩაურის მუნიციპალიტეტში: სალიბაური, სარფი. სემეკის ახალ გადაწყვეტილებაზე „ბათუმელების“ კითხვებს დავით ლეკვიშვილი – „სოკარ ჯორჯია გაზი აჭარას“ დირექტორი პასუხობს.

 

დავით ლეკვიშვილი
დავით ლეკვიშვილი

ბატონო დავით, ბუნებრივი აირის ბინაში შეყვანა 200 ლარით გაიაფდა. ვის ეხება ეს  ცვლილება?

 

დიახ, ხუთი ნოემბრიდან ძალაში შევიდა ახალი რეგულაციები და ერთი წერტილის მოწყობა 600-ის ნაცვლად 400 ლარია, მაგრამ აქ გასათვალისწინებელია მთელი რიგი ფაქტორები. პირველ რიგში ის, რომ მომხმარებელს ტარიფი ერთი წერტილის ასე ვთქვათ, მოხმარების ზღვარით, ანუ საათში გაზის ხარჯის მიხედვით განესაზღვრა. უფრო ზუსტად, მაქსიმალური ხარჯი უნდა იყოს ექვსი კუბ.მ/სთ-ში (შეიძლება ეს ერთი წერტილი იყოს გაზქურა, შესაძლებელია გამათბობელი და ასე შემდეგ). მოქალაქე ამ პირობით შეძლებს დანადგარამდე სრულ გაზიფიცირებას 400 ლარით. ანუ მას ამ 400 ლარში ერთი წერტილის არჩევის უფლება აქვს. მოქალაქეს შეუძლია დაამატოს წერტილები, თუმცა ამ დამატებით წერტილებზე ის დამატებით იხდის თანხას. ჩვენ ვალდებული ვართ დანადგარამდე გარკვეული სტანდარტებით მივიყვანოთ ბუნებრივი აირი, რომელიც მიგვყავს ლითონის მილით, ვამონტაჟებთ მრიცხველსაც. ფაქტობრივად, შესაძლებელია ჩვენი დანახარჯი გაცილებით მეტს შეადგენდეს, ვიდრე 400 ლარია, მაგრამ ეს ჩვენი ვალდებულებაა და უნდა შევასრულოთ. მოქალაქეს კი შეუძლია საფასური ნაწილობრივ გადაიხადოს ან ერთჯერადად. ზოგადად, ეს ცვლილება მოსახლეობის სოციალური მდგომარეობაზეა გათვლილი. 

 

ანუ კომპანიისთვის ეს პროცესი არ არის მომგებიანი?

 

მოკლევადიან პერსპექტივაში სამუშაოს ღირებულება თვითღირებულებაზე გაცილებით მეტია, რადგან ყველაფერი დამოკიდებულია სამუშაოს მოცულობაზე. ხშირად გაცილებით მეტი ჯდება მასალები, აღრიცხვის კვანძი, სამუშაო რესურსი და სხვა დეტალები, რომლსაც შევიძენთ, თანაც საქართველოში არც ერთი ეს დეტალი არ იწარმოება. ფასებიც ცვალებადია და ჩვენი სტატისტიკითაც გაცილებით მეტი ჯდება, მაგრამ, როგორც აღვნიშნე, ეს ჩვენი ვალდებულებაა.

 

მოქალაქეებთან აფორმებთ თუ არა ხელშეკრულებებს?

 

წესებთან ერთად შემუშავდა და დადგინდა რა ფორმით უნდა მოგვმართოს მოქალაქემ. ერთ წერტილზე განაცხადით მომართვის გარდა არანაირი ხელშეკრულება არ ფორმდება, რადგან ტარიფი განსაზღვრულია. ხელშეკრულება ფორმდება იმ მომხმარებლებთან, რომლებსაც სურთ ერთ წერტილზე მეტი დანადგარების მოწყობა, ანუ ხელშეკრულება ფორმდება დამატებითი წერტილების მოწყობის შემთხვევაში. 

 

თქვენ აღნიშნიშნეთ, რომ ახალი რეგულაცია 5 ნოემბრიდან ამოქმედდა, იმ შემთხვევაში თუ მოქალაქეს, მაგალითად, განცხადება აქვს დაწერილი 5 ნოემბრამდე, ძველი ტარიფით სარგებლობს თუ ახალი ტარიფით?

 

მოქმედებს ახალი ტარიფი, მაგრამ მოქალაქემ დამატებით უნდა მოგვმართოს. ამ დღეებში მოქალაქეებმა მოგვმართეს და ითხოვეს ახალი რეგულაციით სარგებლობა. ზოგმა ძველი ტარიფით სარგებლობა არჩია, რადგან განისაზღვრა ახალი ვადებიც. ძველი რეგულაციებით ერთი თვეში ვართ ვალდებული მოვახდინოთ გაზიფიცირება, ახალი რეგულაციით კი 40 სამუშაო, ანუ 60 კალენდარულ დღეში.

 

ახალი რეგულაცია გაზის ფასს ხომ არ გაზრდის?

 

ვერ გეტყვით, რომ იზრდება ან მცირდება ტარიფი, წლის ბოლოა, რაღაც კორექტივები შესაძლოა მოხდეს. ჯერ ვერ დავადასტურებ ამის შესახებ ინფორმაციას.

ნეტგაზეთის მასალების სხვა გამოცემებში გადაბეჭდვის წესი
ნათია როყვა