Batumelebi | ბათუმში ელენე გიორგაძის კლინიკის ფილიალი იხსნება ბათუმში ელენე გიორგაძის კლინიკის ფილიალი იხსნება – Batumelebi
RU | GE  

ბათუმში ელენე გიორგაძის კლინიკის ფილიალი იხსნება

 

2014 წლის ნოემბერში ბათუმში ენდოკრინოლოგიის ეროვნული ინსტიტუტის – ელენე გიორგაძის კლინიკის ფილიალი გაიხსნება კომპლექს „მაგნოლიაში“ – ამის შესახებ 6 ნოემბერს, საზოგადოებრივ აკადემია „BPA“-ში ჩატარებული მასტერკლასის შემდეგ ენდოკრინოლოგმა ლაშა უჩავამ განაცხადა. მან  ბათუმში მასტერკლასი ჩაატარა თემაზე – „სიმსუქნე -კოსმეტიკური პრობლემაა თუ ქრონიკული დაავადება“. 

 

ლაშა უჩავა, ენდოკრინოლოგი
ლაშა უჩავა, ენდოკრინოლოგი

ენდოკრინოლოგიის ეროვნული ინსტიტუტის სტატისტიკური მონაცემებით, საქართველოს მოსახლეობის დაახლოებით 40-45%  სიმსუქნე აწუხებს, როგორც დაავადება.

 

ენდოკრინოლოგ ლაშა უჩავას თქმით, სიმსუქნის გამომწვევი მიზეზი, გარდა კვებისა, გენეტიკური განწყობა და ფიზიკური აქტივობის დაქვეითება შეიძლება იყოს.

 

„სიმსუქნე  ხარისხებად იყოფა და ითვლება სხეულის მასის ინდექსის მიხედვით: წონა შეფარდებული  სიმაღლესთან. მაგალითად, თუ ადამიანი არის 175 სანტიმეტრი სიმაღლის, ამ შემთხვევაში მისი მაქსიმალური წონა შეიძლება იყოს  84-85 კილოგრამი.  85 კგ-ზე 10 კგ-ით მეტი არის ჭარბი წონა, მაგრამ ამაზე მეტი, უკვე ითვლება ქრონიკულ დაავადებად. აქედან გამომდინარე, ეს არ არის მხოლოდ კოსმეტიკური პრობლემა,  ეს არის დაავადება, რომელსაც სჭირდება კომპლექსური მკურნალობა,“ – აღნიშნა ლაშა უჩავამ.

 

მისი განმარტებით,  ქრონიკულ დაავადებაში გადაზრდილი სიმსუქნე  პირველ რიგში იწვევს შაქრიან დიაბეტს, (ტიპი 2), ასევე, სიმსუქნე მოქმედებს გულსისხლძარღვთა სისტემაზე, იწვევს სუნთქვით უკმარისობას და ონკოლოგიური დაავადებების რისკს ზრდის დაახლოებით 20-30%-ით.

 

„სიმსუქნის განვითარებამ იმატა ბოლო 30 წლის განმავლობაში. ამაზე ევროპის სამედიცინო საზოგადოებას ჩატარებული აქვს კვლევა და თუ სიმსუქნით ევროპის ქვეყნებს შორის 90 წლებში საქართველო იყო დაახლოებით19-20 ადგილზე, დღეს არის ათეულში“  – ამბობს ლაშა უჩავა. იგი სამ მთავარ ფაქტორს გამოჰყოფს სიმსუქნის დასაძლევად:  „ფიზიკური აქტივობის გაზრდა,  ჯანსაღი კვება და სითხის დიდი რაოდენობით მიღება.“ 


ნეტგაზეთის მასალების სხვა გამოცემებში გადაბეჭდვის წესი
თაკო ათაბაგი