Batumelebi | ბრიფინგი ნაციონალურ მოძრაობაში და არჩილ ხაბაძის პასუხი ბრიფინგი ნაციონალურ მოძრაობაში და არჩილ ხაბაძის პასუხი – Batumelebi
RU | GE  

ბრიფინგი ნაციონალურ მოძრაობაში და არჩილ ხაბაძის პასუხი

 

დღეს, 8 ოქტომბერს,  „ერთიანი ნაციონალური მოძრაობის“ წევრმა ჯუმბერ კახიძემ ბრიფინგი გამართა და ბათუმში, გადაუღებელი წვიმების შედეგად დაზარალებულ მოსახლეობაზე ისაუბრა.  

 

ჯუმბერ კახიძე
ჯუმბერ კახიძე

„მივმართავ როგორც აჭარის ხელისუფლებას, ასევე   მუნიციპალიტეტის ხელმძღვანელობას, რომ აღიწეროს ზარალი. მე თვითონ  დავაყენებ ამ საკითხს უახლოეს საკრებულო სხდომაზე  და მაინტერესებს მათგან არგუმენტი, თუ  რატომ არ მოხდა ამდენი ხნის მანძილზე  ზარალის დათვლა“ – განაცხადა ჯუმბერ კახიძემ.

 

იგი ამბობს, რომ სტიქიისგან დაზარალებულ მოსახლეობას შეხვდა: „ვნახეთ რამდენიმე ათეული ოჯახი, რომლებიც სერიოზულად არიან დაზარალებულნი და დღემდე  ელოდებიან, რომ მივა ვიღაც და შეაფასებს [მათ ზარალს], ან  კოპენსაციის თანხა გაჟღერდება, მაგრამ კომპენსაციის თანხა  არ ჟღერდება არც აჭარის ხელისუფლების და არც ქალაქის მთავრობის მიერ. არის ოჯახები, სადაც განცხადებაც დაიწერა, მაგრამ არავინ არ მისულა, დღემდე უნდა იყოს დათვლილი ზარალის მიახლოებითი ოდენობა მაინც, რომ მოხდეს ცვლილება ბიუჯეტში“- ამბობს ჯუმბერ კახიძე.

 

დღესვე ჯუმბერ კახიძის განცხადებას აჭარის მთავრობის თავმჯდომარე არჩილ ხაბაძე გამოეხმაურა:  

 

„მე ვთხოვ  „ერთიან ნაციონალურ მოძრაობას“, დემაგოგურ განცხადებებს აჯობებს თავად ჩაერთონ ამ პროცესებში,  იმიტომ, რომ სტიქია იყო მასშტაბური.  ვითვლით ზარალს, ზუსტი ციფრები არ არის ჯერ ცნობილი,  600-ზე მეტი განცხადებაა შემოსული, სატელეფონო შეტყობინები – ერთი ამდენი“ – განაცხადა არჩილ ხაბაძემ დღეს, ჩაქვში, სადაც მთავრობის თავმჯდომარე ციტრუსის საადრეო ჯიშის მოსავლის კრეფას ესწრება.

 

 

 

ნეტგაზეთის მასალების სხვა გამოცემებში გადაბეჭდვის წესი
მოხალისე , თაკო ათაბაგი