კომპანია Lc -ჯგუფი ბათუმში, ვაჟა-ფშაველას ქუჩის #27-ში, ძეგლის დაცვის ზონაში მრავალბინიანი სახლის მშენებლობას გეგმავს. კომპანიამ პროექტი აჭარის კულტურული მემკვიდრეობის სააგენტოს 2016 წელს შეათანხმა.
სააგენტოს ხელმძღვანელის ლაშა ასლანიშვილის ინფორმაციით, ამჯერად კომპანიამ სააგენტოს მხოლოდ პროექტის არქიტექტურული ნაწილის შეთანხმებაზე მიმართა.
ვაჟა-ფშაველას 27 ნომერში მდებარე ბელეტაჟის ტიპის სახლს კულტურული მემკვიდრეობის ძეგლის სტატუსი აქვს. სახლს სახურავი გადახდილია და წვიმა აზიანებს.
კულტურული მემკვიდრეობის ძეგლის განადგურების საფრთხეზე განცხადება საზოგადოება „ბათომმა“ რამდენჯერმე გააკეთა, თუმცა არც კულტურული მემკვიდრეობის სააგენტოს და არც ბათუმის მერიას რეაგირება არ მოუხდენია.
სააგენტოს ინფორმაციით, კომპანია Lc -ჯგუფი ამ სახლის გადახურვისა და მისი რეაბილიტაციის ვალდებულებას აიღებს, კომპანია სარეაბილიტაციო სამუშაოებს ჩაუტარებს ასევე ძეგლის გვერდით მდებარე ერთსართულიან ბელეტაჟს.
ვაჟა-ფშაველას #27-ში მდებარე კულტურული მემკვიდრეობის ძეგლის გვერდით კომპანია Lc -ჯგუფი შვიდსართულიანი სახლის მშენებლობას გეგმავს.
პროექტის რენდერი
