შუახევში, სოფელ ჩანჩხალოს სკოლაში ახალი სასწავლო წელი ამ დრომდე არ დაწყებულა. მშობლები ბავშვებს სკოლაში არ უშვებენ. სოფელში „შუახევი ჰესისათვის“ საჭირო გვირაბის მშენებლობა მიმდინარეობს. აფეთქების ხმა დღეში რამდენჯერმე ისმის და როგორც მოსახლეობა ამბობს ყოველი აფეთქების შემდეგ სახლებზე ახალი ბზარები ჩნდება. ბზარები არის სკოლაზეც. სოფლის მცხოვრებნი ენერგეტიკის მინისტრთან, კახი კალაძესთან შეხვედრას ითხოვენ.
სოფელში უკვე იმყოფებოდა აჭარის მთავრობის თავმჯდომარე არჩილ ხაბაძე. თუმცა მოალაპრაკებები უშედეგოდ დასრულდა.
„ამოვიდა მთავრობის თავმჯდომარე. იყო მოლაპარაკება რომ არ უნდა აფეთქებულიყო დღისით, სკოლის დროს. მოლაპარაკება დავამთავრეთ, წამოვედით, იმ დღესვე ააფეთქეს. აფეთქებები მიმდინარეობს ყოველდღე, სკოლას ემატება ბზარები. დღესაც მუშაობენ. გარანტიას რომ ეს სკოლა არ დაინგრევა ვერ გვაძლევს ვერავინ. არც გეოლოგები მოდიან და არც არავინ,“ – უთხრა „ბათუმელებს“ სოფელ ჩანჩხალოს მკვიდრმა ემზარ დუმბაძემ.
ემზარ დუმბაძე ამბობს რომ ორშაბათს, 6 ოქტომბერს სოფელში კიდევ ერთ აქციას გამართავენ მშენებარე გვირაბის წინ და საქართველოს ენერგეტიკის მინისტრს, კახი კალაძეს დაელოდებიან.
