დღეს, 30 ივნისს, ქობულეთში სახალხო დღესასწაული – „ქობულეთობა“ აღინიშნება.
დღესასწაულთან დაკავშირებით სახალხო ზეიმი ქობულეთის ცენტრალურ პარკშია დაგეგმილი. ღონისძიებაზე გამოვლინდებიან საპატიო ქობულეთელები, დაჯილდოვდებიან ქობულეთის მუნიციპალიტეტის სკოლების მიმდინარე სასწავლო წლის წარმატებული კურსდამთავრებულები. ცენტრალურ პარკში გამოფენენ ცნობილი ქობულეთელების პორტრეტებს. დღესვე პოლონეთის ქალაქ ობორნიკთან საზეიმო ვითარებაში გაფორმდება თანამშრომლობის მემორანდუმი. ღონისძიებას პოლონეთის ელჩი საქართველოში, ანდჟეი ჩიეშკოვსკი ესწრება.
ქობულეთობის სახალხო დღესასწაულთან დაკავშირებით ქალაქის ცენტრალურ პარკში გამოიფინება ადგილობრივი ნაწარმი, ქობულეთის ღვინის სახლი სტუმრებს ადგილობრივი გასტრონომიითა და კულინარიული ნაწარმით გაუმასპინძლდება, თვითმმართველი ერთეულები კი წარმოდგენილი იქნებიან მათთვის დამახასიათებელი საგამოფენო კუთხეებით. ამფითეატრში გაიმართება საბავშვო და ფოლკლორული ანსამბლების კონცერტები, პარკის ტერიტორიაზე კი – იმიტირებული ქობულეთური ქორწილი. დღის ბოლოს, 19:00 საათზე, ცენტრალურ პარკში დაგეგმილია ფერების ფესტივალი. სახალხო ზეიმი 20:00 საათზე გალა კონცერტით დასრულდება.
ამავე თემაზე: 4 გოჭი და 200 ტოლმა 110 პერსონაზე – ქობულეთი სეზონის გახსნისთვის ემზადება
