საქართველოს ეროვნულმა ბანკმა [სებ] კომერციული ბანკების აქტივების მდგომარეობის შესახებ ბოლო სტატისტიკური მონაცემები გამოაქვეყნა. სების ინფორმაციით, 2017 წლის 1-ლი ივნისის მდგომარეობით, საქართველოს საბანკო სექტორი 16 კომერციული ბანკითაა წარმოდგენილი; მათ შორის 15 – საწესდებო კაპიტალში უცხოური კაპიტალის მონაწილეობით.
მიმდინარე წლის მაისში, წინა თვესთან შედარებით, საქართველოს კომერციული ბანკების მთლიანი აქტივები [მიმდინარე ფასებში] 37,6 მლნ ლარით, ანუ 0.1 პროცენტით გაიზარდა და 29.7 მლრდ ლარი შეადგინა.
სების მონაცემებით, საქართველში საბანკო სექტორის საკუთარი სახსრები 4.1 მლრდ ლარს შეადგენს, რაც კომერციული ბანკების მთლიანი აქტივების 13,8 პროცენტია.
რაც შეეხება კომერციული ბანკების საკრედიტო დაბანდების მოცულობას (არარეზიდენტებზე გაცემული სესხების ჩათვლით; კრედო ბანკის მონაცემების გარეშე), 2017 წლის მაისში, წინა თვესთან შედარებით 172.3 მლნ ლარით გაიზარდა და მიმდინარე წლის პირველი ივნისისათვის 18.7 მლრდ ლარი შეადგინა. ამავე პერიოდში, ეროვნული ვალუტით გაცემული სესხების მოცულობა 157.3 მლნ ლარით გაიზარდა, ხოლო უცხოური ვალუტით გაცემული სესხების მოცულობა 15.0 მლნ ლარით გაიზარდა.
ეროვნული ბანკის ინფორმაციით, რეზიდენტი იურიდიული პირებისათვის 2017 წლის მაისის ბოლოს კომერციულ ბანკებს ეროვნული ვალუტით გაცემული ჰქონდათ 2.2 მლრდ ლარის (წინა თვესთან შედარებით 0.9 პროცენტით მეტი), ხოლო უცხოური ვალუტით – 6.1 მლრდ ლარის (0.2 პროცენტით მეტი) მოცულობის სესხი (გაცვლითი კურსის ეფექტის გარეშე 0.8 პროცენტით მეტი).
