Batumelebi | საპროტესტო აქცია უცხოური დაფინანსების წინააღმდეგ საპროტესტო აქცია უცხოური დაფინანსების წინააღმდეგ – Batumelebi
RU | GE  

საპროტესტო აქცია უცხოური დაფინანსების წინააღმდეგ

 

 

ქობულეთში, გამგეობის წინ ადგილობრივი მოსახლეობა აქციას მართავს. აქცია ქობულეთში მცხოვრები მუსლიმანი და ქრისტიანი მოსახლეობის ერთობლივი ორგანიზებით ტარდება. 

 

მუსლიმანური პანსიონი ლერმონტოვის #13 / ქობულეთი

 

„მუსლიმანი და ქრისტიანი მოსახლეობა იკრიბება იმისათვის რომ გააპროტესტოს თურქეთიდან დაფინანსებული სხვადასხვა რელიგიური დაწესებულებების აშენება. თუ ამის საჭიროება არსებობს, საქართველოს სახელმწიფომ უნდა დააფინანსოს“ – განუცხადა „ბათუმელებს“ უფლებადამცველმა თამაზ ბაკურიძემ.

 

დღესვე ქობულეთში პირველ საათზე ლერმონტოვის #13 მდებარე მუსლიმანური პანსიონის გახსნა იგეგმება, რომლის მშენებლობა ადგილობრივების განცხადებით, თურქეთის მოქალაქის მიერ იყო დაფინანსებული. საპროტესტო აქციის მონაწილეთა განცხადებით, სასულიერო სასწავლებლებისან სამლოცველოების მშენებლობა უცხო ქვეყნის ფულით არ უნდა ფინანსდებოდეს. 

 

 

„ვეცდებით რომ პანსიონი დღეს არ გაიხსნას, რადგან არ მოხდეს მოსახლეობაში დაპირისპირება, აქციის მიზანიც სწორედ ეს არის. ვაპირებთ შევხვდეთ პანსიონის ხელმძღვანელობას ამასთან დაკავშირებით“ – განმარტავს თამაზ ბაკურიძე.

 

  სასწავლებელს ორგანიზაცია „ქართველ მუსლიმანთა ურთიერთობა“ ხელმძღვანელობს. ორგანიზაციის თავმჯდომარის რამაზ კაკალაძის თქმით, დღეს სასწავლო წელი დაიწყო და შესაბამისად პანსიონიც უნდა გაიხსნას.

  

„ჩვენ კანონის ფარგლებით ვმოქმედებთ და ალბათ სამართალდამცავი ორგანოები გამოხატავენ კეთილ ნებას და საჭიროების შემთხვევაში შესაბამის ზომებს მიმართავენ. სასწავლებელი 40 მოსწავლეზეა გათვლილი. ამჟამად 30 მოსწავლე გვყავს. სასწავლო წელი დაიწყო და მოსწავლე აუცილებლად უნდა მოვიდეს“ – გვეუბნება რამაზ კაკალაძე.

  

შეგახსენებთ, რომ 10 სექტემბერს ქობულეთში მოსახლეობა მუსლიმანური პანსიონის გახსნის წინააღმდეგ გამოვიდა და პროტესტის ნიშნად გზა გადაკეტა, პანსიონის კარებზე კი დაკლული ღორის თავი მიაჭედეს. ქობულეთის ქრისტიანი მოსახლეობა უბანში მუსულმანური სასწავლებლის გახსნის წინააღმდეგია.

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი