ბათუმის პლაჟზე მამაკაცმა უცხო ქვეყნის მოქალაქე ქალს სცემა


 

დღეს დილით ბათუმში, სანაპიროზე ძალადობის ფაქტი მოხდა. თვითმხილველების თქმით ახალგაზრდა მამაკაცი პლაჟზე ქალს სცემდა.

 

„მამაკაცმა ჩვენს თვალწინ უმოწყალოდ ცემა მისი პარტნიორი, უცხო ქვეყნის მოქალაქე ქალი. როგორც ქალი ამბობს, მამაკაცმა პასპორტი წაართვა და მუდმივად ძალადობდა მასზე. ჩემმა მეგობარმა თარჯიმნის სერვისი შესთავაზა. მე და ერთი თბილისელი გოგო კი მოწმეებად უნდა დავიკითხოთ. მამაკაცი ბათუმელი პოლიციელის შვილია. იმედი მაქვს, დაიჭერენ,“  – წერს ფეისბუქში ფაქტის თვითმხილველი თამუნა გურჩიანი. 

 

„დილით რვა საათზე ანბანის კოშკის მიმდებარე ტერიტორიაზე დავინახეთ როგორ აყურყუმალავებდა ზღვაში ახალგაზრდა მამაკაცი გოგოს. შემდეგ უკვე სანაპიროზე აგრძელებდა მის  წიხლებით ცემას. ყველა ვცდილოდით გაშველებას. ვერ ვაშველებდით. გამოვიძახეთ პატრული, მოვიდა პატრული და ყველანი წავედით პოლიციის განყოფილებაში,“ – ყვება „ბათუმელებთან“ ფაქტის კიდევ ერთი თვითმხილველი თამთა ჩუმაშვილი.

 

 თვითმხილველების თქმით, ძალადობაში ეჭვმიტანილი ბათუმის მეექვსე განყოფილების უფროსის ავტომობილით გადაადგილდება.

 

„ბათუმელები“ დაუკავშირდა შინაგან საქმეთა სამინისტროს პრესსამსახურს. პრესსამსახურის ცნობით გამოძიება 125-ე მუხლითაა დაწყებული. ამ დროისათვის დანაშაულში ეჭვმიტანილის დაკითხვა მიმდინარეობს. 

 

პრესსამსახურის ცნობით მოძალადე პოლიციელის შვილი არ არის, და არც მისი ოჯახის წევრები არ არიან პოლიციის თანამშრომლები. 

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"