მუნიციპალური განვითარების ფონდი კულტურული მემკვიდრეობის ძეგლის „ნიკორწმინდას“ რესტავრაციას გეგმავს. შესაბამისი სამუშაოების შესყიდვის მიზნით ფონდმა ტენდერი 15 მაისს გამოაცხადა. შესყიდვის სავარაუდო ღირებულება 1 246 376 ლარია. წინადადებების მიღება დაწყებულია და ცხრა ივნისამდე გაგრძელდება. ამ ეტაპზე ტენდერში მონაწილეობის სურვილი არც ერთ კომპანიას არ გამოუთქვამს.
სატენდერო დოკუმენტების მიხედვით „რესტავრაცია-რეაბილიტაციის სამუშაოების შესრულებისას დასაქმებული ყველა ძირითადი სპეციალისტი [ხელოვნებათმცოდნე, ქვის რესტავრატორი, ფერმწერი, არქიტექტორ-რესტავრატორი, საშენ მასალათა ტექნოლოგი] უნდა იყოს მაღალი კვალიფიკაციის და გააჩნდეს კულტურული მემკვიდრეობის უძრავ ძეგლებზე მუშაობის გამოცდილება“.
ამასთან ერთად, მიმწოდებელმა უნდა გაითვალისწინოს, რომ ნიკორწმინდა მოქმედი ტაძარია, შესაბამისად, სამუშაოები ისე უნდა წარმართოს, რომ მღვდელმსახურების ჩატარებას ხელი არ შეეშალოს, განსაკუთრებით დღესასწაულებზე.
ფოტო: გულნარა კაკაბაძე
სატენდერო წინადადება საბანკო გარანტიით უზრუნველყოფასაც ითვალისწინებს. საგარანტიო თანხა ღირებულების 5% უნდა იყოს, ხოლო თეთრ სიაში რეგისტრირებული მიმწოდებლებისათვის [თეთრ სიაში ხვდებიან კომპანიები, რომლებიც სახელმწიფო სტრუქტურებთან ნაკისრს ვალდებულებებს შეთანხმების შესაბამისად ასრულებენ და მათ მუშაობაში ხარვეზები არ დაფიქსირებულა ] საბანკო გარანტიის მოცულობა განისაზღვრება სახელშეკრულებო ღირებულების 2.5%-ის ფარგლებში.
