„ერთიანი ნაციონალური მოძრაობის“ წარმომადგენელი, რაულ თავართქილაძე ამბობს, რომ ბათუმში, მეხუთე განყოფილების თანამშრომელი, პოლიციელი ილია კუკულაძე სცემეს, დამნაშავეები კი შს მინისტრის ალექსანდრე ჭიკაიძის დავალებით, აჭარის მთავარი სამმართველოს უფროსმა დავით თამაზაშვილმა გაათავისუფლა. შს სამინისტროს ინფორმაციით, ფაქტზე გამოძიება ხულიგნობის მუხლით მიმდინარეობს.
„ნაციონალური მოძრაობის“ მტკიცებით, ინციდენტი ბათუმში, პუშკინის ქუჩაზე 26 ივნისს მოხდა. პოლიციის ცემასა და შეურაცხყოფაში ბრალდებულები, რაულ თავართქილაძის ინფორმაციით, სავარაუდოდ, სპორტსმენები არიან. რაულ თავართქილაძე ასევე ირწმუნება, რომ ბრალდებულები მინისტრ ჭიკაიძის ახლობლები არიან.
შინაგან საქმეთა სამინისტროში ამბობენ, რომ ფაქტთნ დაკავშირებით გამოძიება ხულიგნობის მუხლით მიმდინარეობს, ინციდენტის დროს პოლიციის თანამშრომელი სამსხურებრივ მოვალეობას არ ასრულებდა, სხვა კითხვებს კი ამ დროისთვის შს სამინისტროში არ პასუხობენ.
