Batumelebi | „დეპუტატის ძმამ დამჭრა“ „დეპუტატის ძმამ დამჭრა“ – Batumelebi
RU | GE  

„დეპუტატის ძმამ დამჭრა“

 

„ბათუმელების“ ინფორმაციით, ქედის მუნიციპალიტეტში ადგილობრივი თვითმმართველობის არჩევნებში გამარჯვებული დამოუკიდებელი კანდიდატის, სილოვან ბერიძის  შტაბის წევრი დაჭრეს. თვითმხილველების თქმით, მამუკა მახარაძე აჭარის უმაღლესი საბჭოს დეპუტატის, ირაკლი ბარამიძის ძმამ, ბაქარ ბარამიძემ ორი დღის წინ დაჭრა. თავად ბაქარ ბარამიძეც დეპუტატი იქნება ახალი მოწვევის ქედის საკრებულოში „ნაციონალური მოძრაობის“ სიით. შს სამინისტროში დაჭრის ფაქტს არ ადასტურებენ.

 

 

 

ქედის საავადმყოფოში ადასტურებენ მამუკა მახარაძი მიყვანის ფაქტს, თუმცა ჭრილობის ხარისხზე განმარტებას არ აკეთებენ.

 

„ბათუმელებმა“ მოახერხა დაკავშირებდა მამუკა მახარაძეს, რომელმაც ინციდენტის დეტალები მოყვა: „ხელს ვერ ვამოძრავებ მხარში. ჭრილობა ზურგზე მაქვს, 3 ნაკერია გაკეთებული. მეუბნებიან ჭრილობა 5-7 სანტიმეტრიაო, მაგრამ ეს დასკვნაში არ გადაცემულა. პოლიციაში არ გადაცემულა. რატომ არ ვიცი. არც ის ვიცი, ვინ გადაეწყვიტა, რომ არ გადაეცათ. მე დღეს მივდივარ თბილისში, ექიმს უნდა ვეჩვენო, ხელს ავამოძრავებ თუ ვერა და დანარჩენს მერე შევხედავ, ჩემ საქმეში“.

 

მამუკა მახარაძე ამბობს, რომ მასზე თავდამსხმელს „ნახევარმეტრიანი ხანჯალი ეკავა ხელში, მოჩუქურთმებული“: – რა იყო მიზეზი? – ჩვენ შორის კონფლიქტი, რა თქმა უნდა, პოლიტიკურ ვარიანტს მოყვა, საწყისი მაგი იყო, მაგრამ ამ მომენტში ჩვენ ამ თემაზე არ ვლაპარაკობდით. მე ვლაპარაკობდი ჩემ პირად საქმეზე და ის ჩამერია და მოულოდნელად დამარტყა ხანჯალი. მაგიდასთან ვიჯექი და ლუდს ვსვამდი“.

 

შს სამინისტროს ინფორმაციით, საქმე აღძრულია სისხლის სამართლის კოდექსის 118-ე მუხლით, რაც სხეულის ნაკლებად მძიმე დაზიანებას გულისხმობს. როგორც პრესცენტრში ამბობენ, ამ ეტაპზე არ შეუძლიათ იმის თქმა, მამუკა მახარაძე იარაღით არის თუ არა დაჭრილი. მათი თქმით, ამ კითხვაზე პასუხის გაცემა მხოლოდ ექსპერტიზის დასკვნის შემდეგ იქნება შესაძლებელი.

 

საქმეს ქედის პოლიცია იძიებს.

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"