Batumelebi | დაპირდა თუ არა არჩილ ხაბაძე გონიოს მოსახლეობას მიწებს ხმების სანაცვლოდ დაპირდა თუ არა არჩილ ხაბაძე გონიოს მოსახლეობას მიწებს ხმების სანაცვლოდ – Batumelebi
RU | GE  

დაპირდა თუ არა არჩილ ხაბაძე გონიოს მოსახლეობას მიწებს ხმების სანაცვლოდ

 

„სალომე ზურაბიშვილი – საქართველოს გზა“  წარმომადგენლებმა  დღეს  ვიდეო გაავრცელეს, სადაც აჭარის მთავრობის თავმჯდომარე არჩილ ხაბაძე, უფლებადამცველი თენგიზ ბაკურიძე გონიოს მოსახლეობას კამერების გარეშე შეხვდნენ. 

 

ბათუმის მერობის კანდიდატის, გოჩა გუგუნავას შტაბის  განცხადებით, არჩილ ხაბაძემ მოსახლეობას წინასაარჩევნოდ მიწის დარეგისტრირებას დაპირდა, რაც წინასაარჩევნო მოსყიდვაა.

 

„კომისია არის შექმნილი და ყოველ დღე ვმუშაობთ იმაზე, რომ სწორი გადაწყვეტილება მივიღოთ“- ეუბნება არჩილ ხაბაძე შეხვედრაზე მისულ მოსახლეობას.

 

ვიდეოჩანაწერში ჩანს, რომ საუბარში ერთვება შეხვედრაზე მყოფი ერთ-ერთი მამაკაცი, რომელიც ამბობს:  „თუ გინდათ არჩევნებამდე დავანაწილოთ ეს ნაკვეთები, რახან წამოიჭრა ეს საკითხი. მოიტანეთ რეალური სია, ცენტრალური ხელისუფლებიდანაც არის პოლიტიკური ნება და ბატონმა არჩილმაც ბრძანა“.

 

„არც ვყიდით (მიწას)და არც არაფერს ვუშვებით…“ -ამბობს ხაბაძე ჩანაწერში.

 

 

არჩილ ხაბაძემ, გავრცელებულ ვიდეოსთან დაკავშირი კომენტარი, საკუთარი ფეისბუკის გვერდზე გააკეთა. განცხადებას გთავაზობთ უცვლელად:

 

„ არ მაქვს სურვილი აგონიაში მყოფი ოპონენტების პროვოკაციას ავყვე, მაგრამ საზოგადოების ინტერესების გათვალისწინებით საჭიროდ ვთვლი გამოვეხმაურო გოჩა გუგუნავას განცხადებას, თითქოს გონიოს მოსახლეობას მიწების დაბრუნებას დავპირდი არჩევნებში ხმის მიცემის სანაცვლოდ.

სრული პასუხისმგებლობით ვაცხადებ, რომ აღნიშნული ინფორმაცია არ შეესაბამება სიმართლეს. 13 ივნისს უფლებადამცველ თამაზ ბაკურიძესთან ერთად მართლაც შევხვდი გონიოს მოსახლეობას მათივე თხოვნით და კიდევ ერთხელ განვუმარტე, რომ სამთავრობო კომისია მუშაობს აღნიშნულ საკითხზე და მხოლოდ შესწავლისა და საბოლოო დასკვნის შემდეგ იქნება შესაძლებელი მათ მოთხოვნებზე რეაგირება. არანაირი საუბარი არჩევნებზე და დაპირება მიწების დაბრუნებაზე არ ყოფილა. რაც შეეხება ოპონენტის მიერ გავრცელებულ ვიდეოს, ისიც ადასტურებს, რომ საუბარი არჩევნებს არ ეხებოდა“.

ნეტგაზეთის მასალების სხვა გამოცემებში გადაბეჭდვის წესი
"ბათუმელები"