20 მაისს 13:00 საათზე, ბათუმში კულტურული მემკვიდრეობის დაცვის სააგენტო, ძმები ნობელების მუზეუმში უცნობი კოლექციის – „ბათუმის ისტორიის ახალი ჩარჩოები“, გამოფენას გეგმავს.
გამოფენაზე წარმოდგენილი იქნება 2007-2014 წლებში მუზეუმის მიერ შეძენილი თუ ნაჩუქარი ექსპონატები, რომლებიც მოგვითხრობენ ქალაქ ბათუმის, ეკონომიკური და კულტურული ცხოვრების შესახებ.
„ეს ის მასალებია, რომლებიც უცნობია ფართო საზოგადოებისათვის, ამ კუთხით არის საინტერესო გამოფენა ბათუმის და ზოგადად, საქართველოს ისტორიის არაერთი საკითხის დაზუსტებისა და კვლევის თვალსაზრისით. ცალკეა წარმოდგენილი კომპანიების ,,ბრანობელისა’’ და ,,ატლას დიზელის’’ მოღვაწეობის ამსახველი ახალი მასალები, საგაზეთო თუ სხვა სახის რეკლამები“- აცხადებენ კულტურული მემკვიდრეობის სააგენტოში.
გამოფენის ფარგლებში გაიხსნება ორი ახალი საექსპოზიციო კუთხე:
1) ბათუმის ,,ნავთობგადამამუშავებელი ქარხანა’’ – იგი ასახავს ქარხნის მშენებლობას XX საუკუნის 20-30-იან წლებში. ფოტოები გადაღებულია ა.შაანიანის მიერ. მათზე ნათლადაა ასახული შესაბამისი პერიოდის ბოლშევიკური რუსეთის სამრეწველო შესაძლებლობები.
2) ,,ძველი ბათუმის ფოტოგრაფები’’ – წარმოდგენილია საბჭოური პერიოდის ფოტოაპარატები, ძველ ბათუმში მოღვაწე ფოტოგრაფთა ფოტოების ეგ.წ.,,ზანდიკები’’.
თავისუფალი აქტივობის სახით მუზეუმი დამთვალიერებლებს სთავაზობს შემეცნებით – გასართობ პროგრამას გეომეტრიული თავსატეხით -,,შვიდი ფიგურის ხელოვნება’’.
