Batumelebi | სიგარეტის ნამწვი თუ ბავშვების „ცელქობა“ – რატომ იწვის ხეები ბათუმში სიგარეტის ნამწვი თუ ბავშვების „ცელქობა“ – რატომ იწვის ხეები ბათუმში – Batumelebi
RU | GE  

სიგარეტის ნამწვი თუ ბავშვების „ცელქობა“ – რატომ იწვის ხეები ბათუმში

 

 

ბათუმში დღეს, 14 მაისს აბაშიძის ქუჩაზე ხე ცეცხლმა დააზიანა. ქალაქში ხეების დაწვის მიზეზებზე „ბათუმელები“ ქალაქის სახანძრო სამსახურის უფროსს, ხუსეინ სირაბიძეს ესაუბრა.  

 

 

ხუსეინ სირაბიძე:  ასეთი შემთხვევები საკმაოდ ხშირია, განსაკუთრებით ზაფხულში. ამ ხეს ფუღურო ჰქონდა, ალბათ ბავშვებმა იცელქეს და გაეკიდა ან შეიძლება სიგარეტი ჩააგდო ვინმემ ფუღუროში. მოსახლეობა რეკავს ასეთ დროს 112-ზე  და ჩვენ გავდივართ. წელიწადში 15 შემთხვევა მაინცაა ასეთი.

 

ძირითადად რა არის ხის დაწვის მიზეზი?

 

გაუფრთხილებელი მოპყრობაა რა თქმა უნდა. სიგარეტის ნამწვი შეიძლება ადვილად გახდეს ამის მიზეზი, აბა მეხი არ ჩამოვარდება ასე. ხან ბავშვების ცელქობას უფრო ჰგავს.

 

თქვენი ინფორმაციით, ხდება იმ პირების გამოვლენა, ვინც ხეს უკიდებს ცეცხლს?

 

ვერ გეტყვით, ეს არ არის ჩვენი კომპეტენციის საკითხი, ეს უკვე პოლიციის პრეროგატივაა.

 

აჭარის გარემოს ზედამხედველობის სამსახურის უფროსის, ვახტანგ ღოღობერიძის განმარტებით, ქალაქის ტერიტორიაზე ხეების განზრახ ან უნებლიე დაწვის შემთხვევაში ზიანი ადგება მუნიციპალურ ქონებას, მაგრამ ამავე დროს ეს არის გარემოს დაცვითი წესების დარღვევა, რაც ისჯება ადმინისტრაციული კანონით, იმის მიხედვით, თუ კონკრეტულად რა ზიანი მიადგა მცენარეს. „ეს უნდა გამოიკვლიოს სპეციალისტმა და დააგინოს, სიცოცხლისუნარიანობა შეუნარჩუნდა თუ არა ხეს, ამის მიხედვით დადგინდება ჯარიმის ოდენობა.“ – ამბობს ვახტანგ ღოღობერიძე.

 

ცეცხლმოდებული პალმა გორგილაძის ქუჩაზე
ცეცხლმოდებული პალმა გორგილაძის ქუჩაზე

 

დათო ტრაპაიძის ფოტო
დათო ტრაპაიძის ფოტო

ნეტგაზეთის მასალების სხვა გამოცემებში გადაბეჭდვის წესი
"ბათუმელები"