დაშავებულები მრავლობითი ჭრილობითა და მოტეხილობით სასწრაფო სამედიცინო დახმარებამ ბათუმის რეფერალურ საავადმყოფოში გადაიყვანა.
ადგილზე იმყოფებოდა აჭარის მთავრობა, ბათუმის თვითმმართველობის ხელმძღვანელები, სასულიერო პირები.
ადგილობრივი მაცხოვრებლები ამბობდნენ, რომ ეკლესიაზე 30 წლამდე ახალგაზრდები მუშაობდნენ.
მამუკა თურმანიძე სამაშველო სამსახურის უფროსი: „საგანგებო სიტუაციების სამსახური შემთხვევის ადგილზე შინაგან საქმეთა სამინისტროს დეპარტამენტთან ერთად გამოვცხადდით. გამოძახებიდან დაახლოებით 15 წუთში მობილიზებული იყო ქედისა და ქობულეთის სამაშველო განყოფილებები. აგრეთვე შსს-ს დანაყოფები და სახანძროს განყოფილება. მშენებარე ეკლესიას გუმბათი, დაახლოებით 50 ტონა მასა ჩამოინგრეული დაგხვდა, მასის ქვეშ ოთხი ადამიანი მოყვა. რაც გავარკვიეთ დღეს [ეკლესიის მშენებლობაზე] გამოძახებული იყო ხუთი მშენებელი. ერთმა მოასწრო ნგრევის დროს გადმოხტომა ის უვნებელი გადარჩა.
ჩამონგრეული გუმბათი
ორ საათიანი ოპერაციის შედეგად ორი ადამიანი ნანგრევებიდან ცოცხლად გამოვიყვანეთ, სამწუხაროდ ორი გარდაცვლილი გვყავს“.
როგორც ადგილზე განმარტავდნენ ნგრევის მიზეზი გუმბათის საყრდენი ბოძების გამოცლამ გამოიწვია.
მოსახლეობის თქმით, სოფელში წმინდა გიორგის სახელობის ეკლესიის მშენებლობა ორი წელია მიმდინარეობს. მას სასულიერო პირები მრევლის დახმარებით და შემოწირულობებით აგებდნენ.
