პრესრელიზს, რომელიც ამ საკითხზე მთავრობამ გაავრცელა უცვლელად გთავაზობთ: „ხვალ, 7 მაისს 11:00 საათზე აჭარის ავტონომიური რესპუბლიკის მთავრობა და ლიბერთი ბანკი ხელს მოაწერენ ურთიერთთანამშრომლობის ხელშეკრულებას, რომლის შესაბამისადაც განხორციელდება მცირე და საშუალო ტურისტული ბიზნესის ხელშეწყობა.
აჭარის ავტონომიური რესპუბლიკის რესპუბლიკური ბიუჯეტის პროგრამის შესაბამისად ბენეფიციარი შეიძლება იყოს პირი, რომელიც ახორციელებს ტურისტულ ბიზნესს აჭარის ავტონომიური რესპუბლიკის ტერიტორიაზე.
პროგრამის ფარგლებში ლიბერთი ბანკი ბენეფიციარებს შესთავაზებს სესხებს გადახდის სეზონური გრაფიკით. აღნიშნული სესხის საპროცენტო განაკვეთი 15% იქნება, აქედან 3%-ს გადაიხდის მოსარგებლე, დარჩენილ 12%-ს სამი წლის განმავლობაში აჭარის ავტონომიური რესპუბლიკის ბიუჯეტიდან დაიფარება, სამი წლის შემდეგ პროცენტის გადახდას მსესხებელი თავად უზრუნველყოფს.
თანადაფინანსების პერიოდის შემდეგ,იმ შემთხვევაში თუ მსესხებელს დარჩენილი სესხის გადახდის პირობები არ დააკმაყოფილებს, მას შესაძლებლობა ექნება გადავიდეს მისთვის სასურველ სხვა ბანკში წინასწარი დაფარვის საკომისიოს გადახდის გარეშე. მსესხებელთა შერჩევა მოხდება აჭარის ავტონომიური რესპუბლიკის მთავრობის მიერ საგანგებოდ შექმნილი კომისიის მიერ, საიდანაც ლიბერთი ბანკი, მის მიერ ჩატარებული ფინანსური ანალიზისა და უზრუნველყოფის შეფასების საფუძველზე გასცემს სესხებს.
