Batumelebi | სტუდენტები ანტიდისკრიმინაციული კანონის შესახებ სტუდენტები ანტიდისკრიმინაციული კანონის შესახებ – Batumelebi
RU | GE  

სტუდენტები ანტიდისკრიმინაციული კანონის შესახებ

 

 

რას ფიქრობენ ბათუმის სახელმწიფო უნივერსიტეტის სტუდენტები ანტიდისკრიმინაციული კანონის შესახებ? – ”ბათუმელებმა” შემთხვევითობის პრინციპით სტუდენტები გამოკითხა. სტუდენთა ნაწილმა საკუთარი მოსაზრების გამოხატვა არ ისურვეს.

 

თინათინ გოგოლიშვილი: ”პირადად ჩემთვის ანტიდისკრიმინაციული კანონი მისაღებია იმიტომ, რომ საქართველოში არაერთი უცხოელი ჩამოდის, თუნდაც ბათუმში ბევრი ინდოელი და აფროამერიკელია. ასევე ტურიზმის თვალსაზრისით, როცა ქვეყანაში ჩამოდის  უცხოელი, ეს კანონი დაიცავს მათ უფლებებს, რომ არ მოხდეს მათი დისკრიმინაცია რაიმე ნიშნით. ქალაქში ბევრჯერ მინახავს თუ როგორ დასცინიან ინდოელებს, რაც მე არასოდროს მომწონდა. ამ კანონის მიღების შემდეგ, ვფიქრობ, მდგომარეობა უკეთესობისაკენ გაუმჯობესდება. რაც შეეხება უნივერსიტეტში დისკრიმინაციის ფაქტებს, მე ამის შესახებ არ გამიგია.

 

რაშო ბაგიროვი: ”ჩემთვის მისაღებია ანტიდისკრიმინაციული კანონი, ვინაიდან საქართველო მიისწრაფვის ევროპის სახლისაკენ, ეს კი ერთ-ერთი მთავარი წინაპირობაა.”

 

თამარ დავითაძე: ”წინააღმდეგი ვარ ანტიდისკრიმინაციული კანონის, რადგან მე ვფიქრობ ჩარჩოებში უნდა იყოს მოქცეული, არის რაღაც ნიუნასები, რომელიც უნდა იყოს შეზღუდული, მაგალითად, ჰომოსექსუალებს არ უნდა ჰქონდეს ბავშვის აყვანის უფლება”.

   

ლიკა მანელიშვილი: „არ ვემხრობი ანტიდისკრიმინაციულ კანონს, რადგან ვთვლი, რომ თუ ადამიანი იქნება განსხვავებული სექსუალური ორიენტაციის შეხედულებების მქონე, თუნდაც როგორიც არიან პანკები და მსგავსი ადამიანები, არ არის აუცილებელი ეს ყველაფერი საზოგადოდ იყოს გამოტანილი, არავინ უშლის მათ ასეთებად ყოფნას, იყვნენ ჩუმად მათთვის, ისე არა, რომ შესამჩნევი გახდნენ  და ვიღაცის აღშფოთება გამოიწვიონ. მაგალითად, მე არ მომეწონებოდა უნივერსიტეტის ეზოში განსხვავებული სექსუალური ორიენტაციის ადამიანების – ჰომოსექსუალების ყურება“.

 

ნათია ბოლქვაძე: „ჩემთვის მიუღებელია ანტიდისკრიმინაციული კანონი, სულაც არ მინდა ჩემი შვილი და მომავალი თაობა ჰომოსექსუალების გვერდით გაიზარდოს, არ მინდა ხედავდნენ ერთი სქესის ადამიანების ერთად თანაცხოვრებას,  როცა ერთი დედის ან მამის ნაცვლად ორი დედა ან ორი მამა ჰყავს. რაც არ უნდა ვიძახოთ, რომ ევროპაში შევდივართ, ჩვენ მაინც ქართველები ვართ , ეს საქართველოა და ვერ შეეგუება ქართველი ხალხი ამას, ყოველთვის იცოცხლებს ქართული მენტალიტეტი“.

 

ანა დვალიშვილი: „მე მომხრე ვარ ანტიდისკრიმინაციული კანონის, რადგან ვთვლი, რომ ნებისმიერი ადამიანი(სქესისა, რელიგიური აღმსარებლობისა, განსხვავებული ორიენტაციისა და სხვა) უნდა იყოს თავისუფალი… სახელმწიფო ვალდებულია თავისუფლება მიანიჭოს. თუ გვინდა ჩვენ თავისუფალ ქვეყანაში ვიცხოვროთ, არ უნდა ძალადობდეს მასზე”.

 

 

 

 

ნეტგაზეთის მასალების სხვა გამოცემებში გადაბეჭდვის წესი
დიანა ბაუჟაძე (მოხალისე)