“საქართველოს ახალ სრულუფლებიან ელჩთან, ბატონ იოსებ ჩახვაშვილისათვის რწმუნებათა სიგელის გადაცემის ცერემონიის დროს შემდგარი საუბრისას, ირანის პრეზიდენტმა ბატონმა ჰასან როჰანიმ საქართველო-ირანის ურთიერთობებსა და სამომავლო პერსპექტივებზე ისაუბრა. ირანის პრეზიდენტმა ყურადღება გაამახვილა რა ორი ქვეყნის ისტორიულ ურთიერთობებზე, ხაზი გაუსვა ირანელი ხალხის კეთილდამოკიდებულებას კავკასიის რეგიონის და განსაკუთრებით საქართველოს მიმართ და აღნიშნა, რომ მისი ქვეყნისათვის შავი ზღვის და განსაკუთრებით ბათუმის პორტთან დაკავშირება ძალიან მნიშვნელოვანია.
ჰოჯათოლესლამ ვალ მოსლემინ დოქტორ ჰასან როჰანიმ დაამატა, რომ ირანის მხარე აპირებს აზერბაიჯანის გავლით საქართველოსთან სარკინიგზო ხაზი გაიყვანოს და აღნიშნა, რომ სამმხრივი ურთიერთობების (საქართველო, აზერბაიჯანი, ირანი) გაღრმავება რეგიონისათვის ძალიან მომგებიანი იქნება. საქართველოს ელჩისადმი რწმუნებათა სიგელის გადაცემისას ბატონმა ჰასან როჰანიმ საქართველო-ირანიოს ისტორიულ-კულტურულ ურთიერთობებზე ისაუბრა და ქართველ დიპლომატს უსურვა, ყოველი ხელსაყრელი შემთხვევა გამოიყენოს, რათა ორ ქვეყანას შორის ურთიერთობები გაღრმავების გზით წავიდეს. საუბრისას პრეზიდენტმა ასევე საქართველო-ირანს შორის საუნივერსიტეტო თანამშრომლობას ხაზი გაუსვა და აღნიშნა, რომ კერძო სექტორისა და ბიზნესურთიერთობებშიც ხელშეწყობილი იქნება მის მიერ.
თავის მხრივ, ბატონი იოსებ ჩახვაშვილი, საქართველოს ელჩი ირანის ისლამურ რესპუბლიკაში შეხვედრისას სპარსულ ენაზე საუბრობდა. მან ის სამი წელი გაიხსენა, როცა 1973-1976 წლებში ისპაჰანის მეტალურგიულ ქარხანაში მოღვაწეობდა. მისი თქმით, საქართველოში ამჟამად მნიშვნელოვანი ცვლილებები განხორციელდა, როგორც პოლიტიკური, ასევე წყობის თვალსაზრისით. ხელისუფლება საპრეზიდენტო მმართველობიდან საპარლამენტოზე გადავიდა, რამაც გააძლიერა პარლამენტის ინსტიტუტი და ხელისუფლება გადავიდა პრემიერ-მინისტრის ხელში. მან დაამატა, რომ საქართველოს მთავრობას დაგეგმილი აქვს ქვეყანაში მნიშვნელოვანი დემოკრატიული რეფორმები განახორციელოს და ასევე მეზობელ ქვეყნებთან უფრო განამტკიცოს ურთიერთობები”.
