გონიოს მიწების საკითხს 15-წევრიანი კომისია შეისწავლის


 

დღეს, 17 აპრილს, აჭარის მთავრობამ ახალი კომისიის შექმნას დაუჭირა მხარი.  მთავრობის აპარატის იურიდიული დეპარტამენტის უფროსის მოადგილის დავით გაბაიძის განცხადებით, კომისიამ გონიოში სადავო მიწების საკითხი უნდა შეისწავლოს. კომისია 15 წევრისგან დაკომპლექტდება და მუშაობას მომდევნო სამშაბათიდან დაიწყებს.

 

 

 

გონიოს მკვიდრთა საპროტესტო აქცია მთავრობის სახლის წინ

 

როგორც დავით გაბაიძე განმარტავს, კომისიაში არასამთავრობო ორგანიზაციიებისა და სამთავრობო ორგანოების წარმომადგენლების გარდა გონიოში მცხოვრები ექვსი პირიც შევა.  კომისიის თავმჯდომარის მოადგილე არასამთავრობო სექტორიდან თამაზ ბაკურიძე იქნება.   

 

„კომისიამ უნდა შეისწავლოს ყველა სადავო მიწის ნაკვეთი, რომელთან დაკავშირებითაც არსებობს კითხვები და პრეტენზიები. შემდგომში კომისია დადებს წინადადებებს და დასკვნებს, თუ რა შეიძლება გაკეთდეს იმისთვის, რომ კანონის ფარგლებში მოხდეს მოქალაქეთა პრეტენზიების დაკმაყოფილება,“-აცხადებს დავით გაბაიძე. 

 

მისივე ინფორმაციით, კომისიის დასკვნებით  განსაზღვრულმა ორგანოებმა უნდა ისარგებლონ: „ ეს შეიძლება იყოს აჭარის მთავრობის თავმჯდომარე, რომელსაც აქვს უფლება სიმბოლურ ფასად განკარგოს მიწის ნაკვეთები,  წარმომადგენლობითი ორგანოები, – საკრებულოები, ასევე პარლამენტი, რომელსაც შეუძლია საკანონმდებლო ინიციატივებით მიიღოს ის ნორმა, რომელიც შესაძლებლობას მოგვცემს გამოვიდეთ არსებული ჩიხიდან. შესაძლებელია აღმასრულებელ ხელისუფლებაშიც გადაწყდეს ეს ყველაფერი, თუ მოხდება შეთანხმება საქართველოს ცენტრალური ხელისუფლების ცალკეულ ორგანოებსა და აჭარის მთავრობას შორის ამ ნაკვეთების გადმოცემის თაობაზე, რომ  მიწები აჭარის კანონმდებლობით დადგენილი სამართლებრივ რეჟიმს დაექვემდებაროს“- განაცხადა გაბაიძემ. 

 

რა ვადებში მოხდება სადავო მიწების შესწავლა, ეს დავით გაბაიძისთვის უცნობია: „კომისიაში ჩემ გარდა შედის 14 წევრი. თუმცა, პირველი სხდომა იქნება საჯარო და იქ გაიგებთ როგორ შევთანხმდებით. კომისიამ პირველივე შეხვედრაზე სამოქმედო გეგმა უნდა დაამტკიცოს“. 

 

კომისიამ მთლიანობაში 271 სადავო მიწის საკითხი უნდა შეისწავლოს.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე