Batumelebi | 25-ე არხის დირექტორი: სახელმწიფო ქონება დემოკრატიის ხელშეწყობისთვის გადმოგვცეს 25-ე არხის დირექტორი: სახელმწიფო ქონება დემოკრატიის ხელშეწყობისთვის გადმოგვცეს – Batumelebi
RU | GE  

25-ე არხის დირექტორი: სახელმწიფო ქონება დემოკრატიის ხელშეწყობისთვის გადმოგვცეს

 

6 აპრილს, „რუსთავი 2“-ის გადაცემა „კურიერი P.S.“ -ში მომზადებულ სიუჟეტში, რომელიც 25-ე არხის მეპატრონეებისათვის ერთ დღეში სახელმწიფო ქონების გადაცემასა და პროკურატურის მხრიდან არხის მფლობელებზე ზეწოლის შესახებ განცხადებას ეხებოდა, 25-ე არხის ერთ-ერთმა დამფუძნებელმა, გია სურმანიძემ განაცხადა, რომ 2012 წელს ქონება სახელმწიფომ არხის დამფუძნებლებს აჭარაში დემოკრატიული პროცესების ხელშეწყობისთვის გადასცა.

 

 

გია სურმანიძე
გია სურმანიძე

სიუჟეტის ავტორის კითხვაზე, რატომ მიიღეს 25-ე არხის დამფუძნებლებმა სახელწიფოსგან 1-დან 4 მილიონ დოლარამდე ღირებულების ქონება, გია სურმანიძემ ასე უპასუხა:

 

„ჩვენ გვითხრეს, რომ რეგიონში, აჭარის რეგიონში დემოკრატიული პროცესების ხელშეწყობისთვის, სიტყვის თავისუფლების განვითარებისათვის, იმ მუშაობისთვის, რაც ჩვენ მოვახდინეთ აჭარაში.“

 

გია სურმანიძეს არ განუმარტავს, არხის დამფუძნებლებისათვის „დემოკრატიის ხელშეწყობისთვის“ სიმბოლურ ფასად გადაცემული მილიონობით დოლარის ღირებულების ქონება რატომ აღმოჩნდა არა უშუალოდ მათი, არამედ მათი ნათესავების საკუთრებაში და არხის დამფუძნებლები კატეგორიულად რატომ უარყოფდნენ ამ ქონებასთან კავშირს დღემდე.

 

გაზეთ „ბათუმელებმა“ სახელმწიფო ქონების 25-ე არხის დამფუძნებლების ნათესავებისათვის გადაცემაზე სტატია 2012 წლის მარტში მოამზადა. მაშინ კითხვაზე, არხის დამფუძნებლების ნათესავებისთვის ქონების გადაცემა გარიგების ფორმა ხომ არ არის არხსა და სახელმწიფოს შორის, გია სურმანიძემ ასე უპასუხა: 

 

„თქვენ რისი თქმა გინდათ, რომ ჩვენ ეს ქონება გავცვალეთ ტელევიზიაში და გადავუფორმეთ ახლო ნათესაობას? ჩემი ქონება თუა, დეიდაშვილთან რატომ უნდა იყოს?.. რა ქონებაა ასეთი, რომ ტელევიზიაზე მეტი ღირს. ბოლოს და ბოლოს, გავყიდი და ფულია ტელევიზია. სერიოზული თანხა ღირს და სურვილი ყველას აქვს, რომ იყიდოს… მე რომ განვაცხადო, ტელევიზიას ვყიდი-მეთქი, როგორ ფიქრობთ, არ გამოჩნდება ხალხი? აქედან გამომდინარე, პირდაპირ გავყიდი და არა ასეთ არეულ სიტუაციაში. ამ ლოგიკითაც იმსჯელეთ…”

 

შეგახსენებთ, ბათუმის 25-ე ტელეარხის დამფუძნებელი და მფლობელი ზეწოლაში ადანაშაულებენ საქართველოს პროკურატურის თანამშრომლებს. ტელეკომპანიის ერთ-ერთმა დამფუძნებელმა და დირექტორმა გიორგი სურმანიძემ პრემიერ-მინისტრ ირაკლი ღარიბაშვილს წერილით მიმართა და საქმის პირადად გაკონტროლება სთხოვა. სურმანიძის განცხადებით, ის და 25-ე არხის მფლობელი ჯემალ ვერძაძე 17 დეკემბერს დაიბარეს მთავარ პროკურატურაში, სადაც მათზე ზეწოლას ახდენდა ათამდე გამომძიებელი და მაღალჩინოსანი და მოითხოვდნენ დაედასტურებინათ, თითქოს 2012 წლის 24 თებერვალს 25-ე არხის წილის გასხვისება მოხდა საქართველოს იმჟამინდელი ხელისუფლების პირველი პირების უშუალო მონაწილეობითა და ორგანიზებით.

ნეტგაზეთის მასალების სხვა გამოცემებში გადაბეჭდვის წესი
ნანა კვაჭაძე